پشاور (اُردو پوائنٹ اخبارتازہ ترین - اے پی پی۔ 15 مارچ2024ء) گورنرخیبرپختونخوا حاجی غلام علی نے کہا ہے کہ
خیبرپختونخوا کی بچیاں میڈیکل کی
تعلیم سمیت تمام شعبوں میں کسی سے پیچھے نہیں ہیں،میڈیکل کالجز سمیت دیگر اعلی تعلیمی اداروں میں بھی لڑکیوں کی تعداد لڑکوں سے زیادہ ہے جوکہ انتہائی حوصلہ افزاء ہے،میری خواہش ہے کہ تعلیمی اداروں میں زیادہ سے زیادہ سہولیات کی فراہمی یقینی بنائی جائے۔
ان خیالات کا اظہار انہوں نے خیبرگرلز میڈیکل کالج کی ٹاپ تھری گولڈمیڈلسٹ طالبات کے اعزاز میں جمعہ کے روزگورنر ہاؤس
پشاور میں نقدانعامات دینے کی خصوصی تقریب سے خطاب کرتے ہوئے کیا۔ تقریب میں میئر
پشاور حاجی زبیرعلی، خیبر گرلز میڈیکل کالج کی وائس ڈین پروفیسر
ڈاکٹر عامر محمد، ٹاپ تھری گولڈ میڈلسٹ طالبات تسنیم زہرا، ماہ نوش صالح،عائشہ، ان کے والدین اور دیگر فیکلٹی اراکین نے شرکت کی۔
(جاری ہے)
اس موقع پر
گورنر نے خیبر گرلز میڈیکل کالج کی ٹاپ تھری گولڈ میڈلسٹ طالبات دیر بالا کے پسماندہ علاقے سے تعلق رکھنے والے خطیب کی بیٹی تسنیم زہراجس نے تعلیمی سیشن 2017-18 میں 21، ماہ نوش صالح نے تعلیمی سیشن 2018-19 میں 17 اور عائشہ اقبال نے تعلیمی سیشن 2019-20 میں 13 گولڈمیڈلز حاصل کئے تھے اُن میں اپنی جانب سے نقد انعامات تقسیم کئے۔طالبات و انکے والدین نے
گورنر حاجی غلام علی کا نقد انعامات سے نوازنے اور حوصلہ افزائی پر شکریہ ادا کرتے ہوئے کہاکہ پہلی مرتبہ صوبے کے گورنر/چانسلر کی جانب سے گورنرہاوس میں مدعوکرکے نقدانعام سے نہ صرف طالبات کی حوصلہ افزائی کی گئی ہے بلکہ ان کی تعلیمی عمدہ کارکردگی کوبھی سراہا گیا ہے جس پر
گورنر حاجی غلام علی کو خراج تحسین پیش کرتے ہیں۔
تقریب میں
فاٹا سے تعلق رکھنے والی 10 طالبات کوبھی بطور مالی تعلیمی امداد نقد رقم دی گئی۔ جن میں ضم ضلع مہمند سے 4 طالبات،
جنوبی وزیرستان سے 2،
شمالی وزیرستان،خیبر،باجوڑ اور ایف آر
پشاور سے 1،1
طالبہ شامل تھی۔اس کے علاوہ خیبرگرلز میڈیکل کالج کے 40 کلاس فورملازمین کوبھی مالی امداددی۔ تقریب سے خطاب کرتے ہوئے گورنرنے کہاکہ چند روز قبل خیبر گرلزمیڈیکل کالج کے کانووکیشن میں طالبات کو ڈگریاں اور گولڈمیڈلز تقسیم کرتے ہوئے مذکورہ تینوں طالبات کی عمدہ تعلیمی کارکردگی سامنے آئی تو اسی وقت تینوں طالبات کو گورنرہاوس مدعو کرکے نقدانعامات سے نوازنے کا فیصلہ کیا۔
آج خیبر میڈیکل کالج کی تینوں ٹاپ گولڈمیڈلسٹ طالبات کو
گورنر ہاؤس بلانا اور نقد انعامات سے نوازنا یہ انکی عمدہ تعلیمی کارکردگی کا اعتراف ہے،تسنیم زہرا، ماہ نوش صالح اور عائشہ اقبال نے ایک ہی تعلیمی سیشن کے دوران بھاری تعداد میں گولڈ میڈلز حاصل کر کے والدین و اساتذہ کا سر فخر سے بلند کیا ہے۔گورنرنے کہاکہ تینوں طالبات و انکے والدین، فیکلٹی اراکین کو آج
گورنر ہاؤس بلا کر عمدہ تعلیمی کامیابی پر سراہا ہے اور توقع ظاہر کی کہ ان تینوں گولڈمیڈلسٹ طالبات سمیت تمام فارغ التحصیل ہونیوالے گریجویٹس
ڈاکٹر اپنی عملی زندگی میں بھی بھرپور محنت اور کوشش جاری رکھیں گے اور دکھی انسانیت کی خدمت کو عبادت سمجھ کر کریں گے ۔
گورنرنے کہاکہ انہوں نے کہا کہ میڈیکل کی
تعلیم مکمل کرنیوالی طالبات بھی اپنی
تعلیم کو ضائع نہ ہونے دیں،نوجوان ڈاکٹرز ریسرچ کرکے
ٹیکنالوجی کے میدان میں حکومت و ریاست کی مدد اور ایک ویژن کے ساتھ نکل کر جدید ریسرچ اور
ٹیکنالوجی سے ملک کو آگے ترقی کے راستے پر ڈالنے میں تعاون فراہم کریں۔ انہوں نے کہاکہ ہمارے صوبے کی بچیاں میڈیکل کی
تعلیم سمیت تمام شعبوں میں کسی سے پیچھے نہیں ہیں اور میڈیکل کالجز سمیت دیگر اعلی تعلیمی اداروں میں بھی لڑکیوں کی تعداد لڑکوں سے زیادہ ہے جوکہ انتہائی حوصلہ افزاء ہے۔انہوں نے کہاکہ میری خواہش ہے کہ تعلیمی اداروں میں زیادہ سے زیادہ سہولیات کی فراہمی یقینی بنائی جائے۔
