حالیہ کارروائی کے باوجود کابل میں طالبان حکومت کے ساتھ تعلقات میں تعطل نہیں، نمائندہ خصوصی

ہفتہ 23 مارچ 2024 15:19

اسلام آباد (اُردو پوائنٹ اخبارتازہ ترین - این این آئی۔ 23 مارچ2024ء) پاکستان کے نمائندہ خصوصی برائے افغانستان آصف درانی نے کہا ہے کہ حالیہ فوجی کارروائی کے باوجود کابل میں طالبان انتظامیہ کے ساتھ تعلقات میں تعطل نہیں ہے۔میڈیا رپورٹ کے مطابق افغان ناظم الامور سردار احمد شکیب کے ساتھ ملاقات کو سفیر آصف درانی نے طالبان حکام کے ساتھ رابطوں کا تسلسل قرار دیا، جو افغانستان میں گل بہادر گروپ کے ٹھکانوں کے بعد کی گئی۔

21 مارچ کو ترجمان دفتر خارجہ نے افغانستان سے حالیہ کشیدگی پر تبصرہ کرتے ہوئے کہا تھا کہ پاکستان نے 18 مارچ کو افغانستان میں دہشتگردوں کے ٹھکانوں کونشانہ بنایا تھا، گزشتہ ہفتے افغانستان میں دہشتگرد گروہ کے خلاف کاروائی کی، ان حملوں کا نشانہ حافظ گل بہادر گروپ کے دہشتگرد تھے۔

(جاری ہے)

ممتاز بلوچ نے واضح کیا تھا کہ افغانستان کی خود مختاری کا احترام کرتے ہیں، پاکستان کی جانب سے حملوں میں افغانستان کے سویلین آبادی کو نشانہ نہیں بنایا گیا۔

سردار احمد شکیب کے ساتھ بات چیت کے دوران آصف درانی نے بنیادی توجہ دہشت گردی سے نمٹنے اور ان چیلنجوں کو کم کرنے کے لیے دو طرفہ تعاون کی تلاش پر روشنی ڈالی۔دوسری جانب ترجمان دفتر خارجہ نے قندھار میں دہشت گرد حملے کی مذمت کی۔ترجمان نے اظہار تعزیت کرتے ہوئے کہا کہ دہشت گردی پاکستان اور افغانستان کا مشترکہ مسئلہ ہے، دونوں ممالک کو مل کر دہشت گردی کا مسئلہ حل کرنے کی ضرورت ہے۔