پولیس اور رینجرز کا کچے کے علاقہ میں آپریشن، 2 مغوی بازیاب

اتوار 24 مارچ 2024 15:40

کندھکوٹ(اُردو پوائنٹ اخبارتازہ ترین - این این آئی۔ 24 مارچ2024ء) تھانہ گبلو کی حدود میں پولیس اور رینجرز کا ڈاکوئوں کیخلاف مشترکہ آپریشن جاری ہے۔ایس ایس پی بشیر بروہی نے بتایا کہ دوران آپریشن پولیس اور ڈاکوئوں کے درمیان جدید اسلحہ سے فائرنگ کا تبادلہ ہوا، پولیس نے 2 ہفتہ قبل غوث پور انڈس ہائی وے سے اغوا ہونے والے 2 مغویوں کو بازیاب کرا لیا۔

(جاری ہے)

بشیر بروہی نے بتایا کہ بازیاب ہونے والے مغویوں میں خالد میرانی اور صدرالدین میرانی شامل ہیں، بازیاب ہونے والے دونوں مغوی صحافی سلیم میرانی کے چچازاد بھائی ہیں۔ایس ایس پی کے مطابق آپریشن کی وجہ سے ڈاکو مغویوں کو ایک جگہ سے دوسری جگہ منتقل کر رہے تھے، پولیس نے ڈاکوئوں پر فائرنگ کر دی جس پر ڈاکو دونوں مغویوں کو چھوڑ کر فائرنگ کرتے ہوئے فرار ہوگئے۔بشیر بروہی کے مطابق پولیس اور ڈاکوئوں کے درمیان مسلسل ایک گھنٹے تک فائرنگ کا تبادلہ جاری رہا، دیگر مغویوں کی بازیابی کیلئے ڈاکوئوں کیخلاف کچے میں آپریشن جاری ہے۔