لاہور، پتنگ بازی کیخلاف کارروائیاں، 24 گھنٹوں میں 128 افراد گرفتار

لاہور (اُردو پوائنٹ اخبارتازہ ترین - آن لائن۔ 27 مارچ2024ء) لاہور بھر میں پتنگ بازی کرنے والوں کے خلاف کارروائیاں، 24 گھنٹوں کے اندر صوبے بھر میں 128 مقدمات درج کرلیے گئے۔ پنجاب پولیس کی جانب سے صوبے بھر میں پتنگ بازی اور دھاتی ڈور کے خلاف کارروائیاں جاری ہیں۔ ترجمان پولیس کے مطابق 24 گھنٹوں کے دوران 128 افراد کو گرفتار کرلیا گیا۔ ترجمان کا کہنا ہے کہ ملزمان کے قبضے سے 14077 پتنگیں اور 10299 ڈوریں و چرخیاں برآمد ہوئی ہیں۔

26 فروری سے اب تک 3228 مقدمات درج اور 3361 قانون شکن گرفتار کیے گئے ہیں۔ صوبے بھر میں ملزمان کے قبضے سے 177631 پتنگیں اور 13892 ڈوریں اور چرخیاں بھی برآمد ہوئی ہیں۔ ملتان پولیس کے مطابق پتنگ بازی کی سزا تین سال قید، ایک لاکھ روپے جرمانہ یا دونوں سزائیں ہوسکتی ہیں۔

(جاری ہے)

دوسری طرف خیبرپختونخوا کے صوبائی دارالحکومت پشاور میں بھی پتنگ بازی پر ایک ماہ کیلئے دفعہ 144 کے تحت پابندی عائدکر دی گئی ہے۔

پتنگ کی خریدوفروخت اور تیاری پر بھی پابندی عائد کی گئی ہے۔ خیال رہے کہ گزشتہ دنوں فیصل آباد میں گلے پر پتنگ کی ڈور پھرنے سے موٹر سائیکل سوار نوجوان کی موت واقع ہوگئی تھی۔ ریسکیو 1122 کے مطابق ثمن آباد کا رہائشی آصف شفیق فیکٹری ایریا پولیس کی حدود میں نوولٹی اوور ہیڈ برج پر جا رہا تھا کہ گلے پر دھاتی ڈور پھرنے سے موقع پر ہی دم توڑ گیا۔