نہیں چاہتی کہ لوگ مجھے ’آنٹی‘ کہیں،صبا فیصل

انگریز کلچر میں آنٹ (Aunt) کہا جاتا ہے لیکن وہاں آنٹی کا مفہوم غلط قسم کی عورت کے طور پر لیا جاتا ہے

جمعہ 5 اپریل 2024 10:50

کراچی (اُردو پوائنٹ اخبارتازہ ترین - این این آئی۔ 05 اپریل2024ء) پاکستانی شوبز انڈسٹری کی نامور سینئر اداکارہ صبا فیصل کا کہنا ہے کہ میں نہیں چاہتی کہ لوگ مجھے ’آنٹی‘ کہیں۔حال ہی میں سینیئر اداکارہ نے نجی ٹی وی چینل کی رمضان ٹرانمیشن میں بطور مہمان شرکت کی اور مختلف امور پر کھل کر گفتگو کی۔اسی پروگرام میں انہوں نے ان اداکاروں اور دوستوں کے بارے میں بھی بات کی جو عمر میں تو زیادہ ہیں لیکن جوان ہونے کا ڈرامہ کرتے ہیں اور دوسروں کو آنٹی یا آپا کہتے ہیں۔

دوران انٹرویو صبا فیصل سے سوال کیا گیا کہ لوگ آپ کو کس نام سے پکارتے ہیں، کوئی آپا، باجی، خالہ کہہ کر مخاطب کرے تو کیسا لگتا ہی اسی پروگرام میں شریک ایک اور مہمان و اداکارہ حنا خواجہ بیات نے میزبان کے سوال کا جواب دیتے ہوئے ایک دلچسپ واقعہ سنایا۔

(جاری ہے)

انہوں نے کہا کہ میری ساس آئرش ہیں اور چونکہ وہ انگریز ہیں تو میں نے اپنی ساس سے پوچھا کہ میں آپ کو کس نام سے پکاروں، جس پر میری ساس نے جواب دیا کہ آپ مجھے کچھ بھی کہہ کر پکار سکتی ہیں لیکن آنٹی کے نام سے مخاطب نہ کرنا جو پاکستان میں بہت زیادہ استعمال کیا جاتا ہے۔

حنا خواجہ بیات نے کہا کہ انگریز کلچر میں آنٹ (Aunt) کہا جاتا ہے لیکن وہاں آنٹی کا مفہوم غلط قسم کی عورت کے طور پر لیا جاتا ہے۔جس پر صبا فیصل نے بھی کہا کہ اگر انہیں کوئی آنٹی کہہ کر مخاطب کرے تو انہیں بٴْرا لگتا ہے۔انہوں نے کہا کہ ’میں نہیں چاہتی کہ لوگ مجھے آنٹی کہہ کر بلائیں، میں یہ ہرگز نہیں چاہتی‘۔