پنجاب یونیورسٹی لائبریری کے زیر اہتمام درس قرآن سیریز کی اختتامی تقریب

جمعہ 5 اپریل 2024 13:07

لاہور(اُردو پوائنٹ اخبارتازہ ترین - این این آئی۔ 05 اپریل2024ء) پنجاب یونیورسٹی لائبریری کے زیراہتمام ’رمضان اور ذکر الٰہی‘ کے موضوع پر درس قرآن سیریز کی اختتامی تقریب کا انعقاد کیا گیا۔ اس موقع پرپنجاب یونیورسٹی شیخ زید اسلامک سنٹرسے ایسو سی ایٹ پروفیسر ڈاکٹر مفتی حافظ عبدالباسط خان، چیف لائبریرین ڈاکٹر محمد ہارون عثمانی، ڈپٹی چیف لائبریرین سیف الرحمان عتیق، لائبریرینز اور طلبائو طالبات نے شرکت کی۔

(جاری ہے)

اپنے خطاب میں پروفیسر ڈاکٹر مفتی عبدالباسط خان نے رمضان المبارک کے مقدس مہینے میں ذکرالٰہی اور عبادت کی اہمیت پر زور دیا۔ انہوں نے قرآنی آیت ’-’لہذا مجھے یاد کرو، میں تمہیں یاد کروں گا‘‘ پر روشنی ڈالتے ہوئے بتایا کہ یہ الٰہی ہدایت وروحانی عقیدت کی باہمی نوعیت کی نشاندہی کرتی ہے،جو اللہ تعالیٰ کی یاد اور اس کے بندوں کے احسان مندانہ اعتراف کے درمیان گہرے تعلق پر زور دیتی ہے۔ڈاکٹر محمد ہارون عثمانی اور سیف الرحمان عتیق نے تقریب کے فکری اور روحانی ماحول کو تقویت دینے کے لیے ڈاکٹر عبدالباسط کے تعاون اور شرکاء کا شکریہ ادا کیا۔ انہوں نے اس عزم کا اعادہ کیا کہ لائبریری کے زیر اہتمام آئندہ بھی ایسی سرگرمیوں کاانعقادجاری رہے گا۔