وزیراعلیٰ مریم نواز شریف کا پاکستان کے یوم دستور کے موقع پر پیغام

منگل 9 اپریل 2024 22:47

لاہور (اُردو پوائنٹ اخبارتازہ ترین - این این آئی۔ 09 اپریل2024ء) وزیر اعلیٰ پنجاب مریم نواز شریف نے پاکستان کے یوم دستور (10اپریل) کے موقع پر پیغام میں کہا ہے کہ یوم دستور منانے کا مقصد آئین کے بانیوں کو خراج عقیدت پیش کرنا ہے ۔وزیراعلی مریم نواز شریف نے کہا کہ یوم دستور اس عہد کی تجدید کا دن ہے کہ آئین کی بالا دستی کوہمیشہ برقرار کھا جائے گا۔

1973ء کا متفقہ آئین پارلیمانی تاریخ کا ایک بڑااہم اور تاریخی واقعہ ہے۔نصف صدی قبل عوام کی منتخب کردہ جمہوری قیادت نے قوم کو ایک متفقہ آئین کا تحفہ دیا۔انہوں نے کہا کہ آئین کے بانیوں کے عزم اور استقلال کی بدولت قوم کو ایک جمہوری و پارلیمانی آئین ملا۔ آئین پاکستان جمہوریت، مساوات، رواداری اور شخصی آزادی کی ضمانت ہے۔

(جاری ہے)

وزیراعلی مریم نواز شریف نے کہا کہ 1973ء کے آئین نے وفاقی اورصوبائی خود مختاری کو بھی نئی جہتوں سے ہمکنار کیا۔

1973ء کا متفقہ آئین اسلامی معاشرے کے قیام اور بنیادی انسانی حقوق کا بھی علمبردار ہے۔ آئین مختلف مذاہب کے ماننے والوں کے باہمی احترام اور آزادی، سماجی انصاف اور مساوات کا تحفظ فراہم کرتا ہے۔انہوں نے کہا کہ حکومت پنجاب دستور پاکستان کو مدنظر رکھتے ہوئے عوام کے حقوق کے تحفظ اورخدمت کے عزم کا ازسرنواعادہ کرتی ہے۔