بھارت، ٹرین میں سفر کے دوران ہندئو انتہاپسندوں نے مسلمان تاجر کونیم برہنہ کردیا،بال اور داڑھی منڈوادی

پیر 15 اپریل 2024 20:05

جے پور(اُردو پوائنٹ اخبارتازہ ترین - این این آئی۔ 15 اپریل2024ء) بھارت میں بی جے پی کے زیر اقتدار ریاست راجستھان میں ہندوانتہاپسندوں نے کپڑے کے ایک مسلمان تاجر ندیم ملک کو نیم برہنہ کرکے شدید تشدد کا نشانہ بنایا اور ان کے سرکے بال اور داڑھی منڈوادی ۔کشمیرمیڈیاسروس کے مطابق یہ واقعہ اس وقت پیش آیا جب27سالہ ندیم ملک ممبئی سے اترپردیش کے ضلع بلند شہر جارہے تھے ۔

ممبئی کے علاقے ملاڈ سے تعلق رکھنے والے ندیم ملک کے ساتھ پیش آنے والایہ واقعہ ان کے خاندان کی جانب سے واٹس ایپ پر ویڈیو شیئر کرنے کے بعد سامنے آیا۔

(جاری ہے)

یہ واقعہ راجستھان میں بھرت پور اور کوٹا کے درمیان پیش آیا۔یہ اس نوعیت کا پہلا واقعہ نہیں ہے بلکہ اس طرح کے متعدد واقعات ماضی میں وقتا فوقتا رپورٹ ہوتے رہے ہیں۔جنوری 2023میں ہندو انتہاپسندوں نے مراد آباد شہر کے ایک 45سالہ ایلومینیم تاجر محمد عاصم حسین کو یوپی میں چلتی ٹرین میں شدید تشدد کا نشانہ بنایا، ان کی داڑھی کھینچی اور جے شری رام کا نعرہ لگانے پر مجبور کیا۔

گزشتہ سال جولائی میں جے پور-ممبئی سنٹرل سپر فاسٹ ایکسپریس میں ریلوے پروٹیکشن فورس (RPF)کے ایک اہلکار نے پہلے اپنے سینئرافسر اور پھر ٹرین میں سوار تین مسلمان مسافروں کو گولی مار کر قتل کر دیا۔