سندھ زرعی یونیورسٹی کی سینٹرل لائبریری کو ڈیجیٹلائیز کرنے کےلئے ابتدائی کام مکمل

حیدرآباد (اُردو پوائنٹ اخبارتازہ ترین - اے پی پی۔ 16 اپریل2024ء) سندھ زرعی یونیورسٹی کی سینٹرل لائبریری کو ڈیجیٹلائیز کرنے کےلئے ابتدائی کام مکمل ہوگیا ہے۔ تفصیلات کے مطابق سندھ زرعی یونیورسٹی ٹنڈوجام کی سینٹرل لائبریری میں لائبریری مینیجمنٹ سسٹم کے ذریعے آن لائن لائبریری، بوک بنک اور ریفرینسز ڈیجیٹلائیز کیا گیا ہے، اس ضمن میں ایک تقریب سینٹرل لائبریری میں منعقد کی گئی جس میں وائیس چانسلر ڈاکٹر فتح مری نے بار کوڈ کارڈ اسکیننگ کے ذریعے اپنا ڈیجیٹل اکاؤنٹ کھول کر افتتاح کیا۔

اس موقع پر وائیس چانسلر، ڈینز اور تدریسی و انتظامی سربراہان کو لائبریری کے ڈیجیٹل سسٹمز، آن لائن لائبریری، بوک بنک اور ریفرینسز کے متعلق آگاہی دی گئی۔ افتتاحی تقریب سے خطاب کرتے ہوئے وائیس چانسلر ڈاکٹر فتح مری نے کہا انفارمیشن ٹیکنالوجی نے دنیا میں ہونے والی تحقیق اور ایجادات کے متعلق معلومات کی فراہمی کو آسان بنادیا ہے جبکہ تدریس و تحقیق کے شعبوں میں طلبا، اساتذہ اور محققین کی معاونت کےلئے ڈیجیٹل لائبریری کا اہم کردار ہے۔

(جاری ہے)

انہوں نے کہا نوجوانوں میں کتاب پڑھنے کا رجحان کم ہوگیا ہے، لہٰذاکتابوں کی موبائل اور کمپیوٹر پر آسان دستیابی کےلئے آن لائن نظام کو مزید موثربنانا ہوگا، لائبریری مینجمینٹ کمیٹی کے چیئرمین ڈاکٹر محمد بچل بھٹو نے بتایا کہ ابھی تک 15 ہزار ٹائیٹل اپ لوڈ کئے گئے ہیں جبکہ مستقبل میں محققین کے تھیسز کو بھی اپ لوڈ کیا جائےگا اور کتابوں کی آسانی سے تلاش اور اس کے رکارڈ کو محفوظ کیا جائےگا۔

انہوں نے کہا کہ کتاب کے متعلق جدید ریفرینس سسٹم کو فروغ دیا جائےگا جبکہ لائبریری کا آن لائن سسٹم اور ویب سائٹ پر سب ڈومین جلد شروع ہوگا۔ اس موقع پر مختلف فیکلٹیز، انسٹیٹیوٹ آف فوڈ سائنسز اینڈ ٹیکنالوجیز، انفارمیشن ٹیکنالوجی سینٹر، اور سب کیمپس عمرکوٹ اور بخاری ماڈل سکول کےلئے 2.4 ملین روپوں کے کتاب بھی تقسیم کئے گئے۔ تقریب میں پرو وائیس چانسلر ڈاکٹر جان محمد مری، ڈین ڈاکٹرعنایت اللہ راجپر، ڈاکٹر سید غیاث الدین شاہ، ڈاکٹر الطاف سیال، ڈاکٹر منظور علی ابڑو، رجسٹرار غلام محی الدین قریشی، ڈاکٹر میر سجاد ٹالپر، ڈاکٹر عبدالمبین لودھی، لائبریرین غلام حیدر جویو، ڈاکٹر محمود الحسن مغل سمیت مختلف شعبوں کے سربراہان موجود تھے۔