وفاقی وزیر منصوبہ بندی کی زیرصدارت اجلاس، 13 جے سی سی کی تیاریوں کے حوالے سے حکام کی وفاقی وزیر کو بریفنگ

اسلام آباد (اُردو پوائنٹ اخبارتازہ ترین - این این آئی۔ 25 اپریل2024ء) وفاقی وزیر برائے منصوبہ بندی ترقی و خصوصی اقدامات احسن اقبال کی زیرصدارت پاک چین اقتصادی راہداری جوائنٹ ورکنگ گروپس اور 13ویں جیسی سی کے حوالے سے جائزہ اجلاس منعقد ہوا۔اجلاس میں سیکرٹری وزارت منصوبہ بندی اویس منظور سمرا ، ایڈیشنل سیکرٹری کامران رحمان خان اور اعلی حکام نے اجلاس میں شرکت کی۔

اجلاس میں گذشتہ سال ہونے والی 12ویں جے سی سی اور ورکنگ گروپس کی سفارشات پر عمل درآمد کا جائزہ بھی لیا گیا۔اجلاس میں 13 جے سی سی کی تیاریوں کے حوالے سے حکام کی وفاقی وزیر کو بریفنگ بھی دی گئی جبکہ ایم ایل ون،قراقرم ہائی وے فیز 2، ڈی آئی خان ژوب ، کراچی سرکلر ریلوے اور دیگر منصوبوں پر ہونے والے معاہدوں پر پیش رفت کا جائزہ بھی کیا گیا۔

(جاری ہے)

اجلاس کی صدارت کرتے ہوئے وفاقی وزیر کا کہنا تھا کہ وزیراعظم شہباز شریف پاکستان جلد ہی چین کا دورہ کریں گے ، وفاقی وزیر نے حکام کو ایم او یوز اور معاہدوں پر عملدرآمد کے لئے لائحہ عمل طے کرنے کی ہدایت بھی جاری کیں۔ان کا کہنا تھا کہ سی پیک معاہدوں پر عملدرآمد کی راہ میں حائل کوئی رکاوٹ برداشت نہیں کی جائے گی انہوں نے کہاکہ سی پیک کے حوالے سے تشکیل دئیے گئے ورکنگ گروپس کے اجلاسوں کے انعقاد میں باقاعدگی لائی جائے۔وفاقی وزیر نے متعلقہ وزارتوں کے ورکنگ گروپس اور فیصلہ سازی میں شرکت کو یقینی بنانے کی بھی ہدایت جاری کیں جبکہ انہوں نے متعلقہ وزارتوں کو ہدایت جاری کیں کہ مل کر 13 ویں جے سی سی اجلاس کے لئے ٹھوس ایجنڈا مرتب کریں۔