پنجاب یونیورسٹی لائبریری کے زیر اہتمام ورلڈ بک اینڈ کاپی رائٹ ڈے پر تقریب کا انعقاد

لاہور (اُردو پوائنٹ اخبارتازہ ترین - اے پی پی۔ 26 اپریل2024ء) ورلڈ بک اینڈ کاپی رائٹ ڈے پر پنجاب یونیورسٹی لائبریری کے زیر اہتمام مختلف تقریبات کا انعقاد کیا گیا،جس میں وائس چانسلر پروفیسر ڈاکٹر خالد محمود کی طرف سے پنجاب یونیورسٹی کتاب میلے کے کامیاب انعقاد پر پبلشرز،بک سیلرز، رابطہ کمیٹی کے اراکین اور رضاکاروں کی خدمات کو سراہا گیا اور پرنسپل اورینٹل کالج پروفیسر ڈاکٹر نبیلہ رحمن نے تعریفی اسناد تقسیم کیں۔

اسی طرح انسٹیٹیوٹ آف انگلش سٹڈیز کی اسسٹنٹ پروفیسر ڈاکٹر عائشہ اکرم رومیلا تھاپر کے بنیادی کام"Voices of Dissent: An Essay"پر روشنی ڈالتے ہوئے ہندوستان کی تاریخ اور معاشرتی اصولوں کی تشکیل میں سیاسی اختلاف رائے کے کردار پر روشنی ڈالی جبکہ اورینٹل کالج کے ایسوسی ایٹ پروفیسر ڈاکٹر محمد نعیم نے محمد سلیم الرحمن کے ’’افسانے، ڈرامے اور ناول کے چند اوراق‘‘ پر دلکش گفتگو کی۔

(جاری ہے)

تقریب کے اختتام پر معروف صحافی اور کتاب سے محبت کرنے والے محمود الحسن نے لائبریری کے10 سرفہرست صارفین کو بک لورز ایوارڈ سے نوازا۔چیف لائبریرین ڈاکٹر محمد ہارون عثمانی نے کہا کہ دلچسپ گفتگو اور قارئین کی پذیرائی سے ہم مطالعے کے کلچر کو فروغ دینے اور دانشورانہ املاک کے حقوق کا احترام کرنے کے عزم کا اعادہ کرتے رہیں گے۔