چینی کمپنیوں کی مدد سے گوادر کی سڑکیں اور عوامی مقامات شمسی توانائی سیروشن

گوادر(اُردو پوائنٹ اخبارتازہ ترین - این این آئی۔ 30 اپریل2024ء) چینی کمپنیوں کی کوششوں کی بدولت گوادر کی سڑکیں اور عوامی مقامات اب شمسی توانائی سے روشن ہو گئے ہیں۔ گوادر کے مقامی باشندے اس پیشرفت سے پہلے، خاص طور پر رات کے وقت غیر مستحکم بجلی کی فراہمی کا سامنا کر رہے تھے۔گوادر پرو کے مطابق چائنا کمیونیکیشن اینڈ کنسٹرکشن کمپنی نے کراچی میں عوامی جمہوریہ چین کے قونصلیٹ جنرل کے ساتھ مل کر گوادر کی مرکزی سڑکوں اور عوامی مقامات کو روشن کرنے کا منصوبہ مشترکہ طور پر شروع کیا ہے۔

مجموعی طور پر 73 شمسی توانائی سے چلنے والی اسٹریٹ لائٹس مختلف مقامات پر نصب کی گئی ہیں جہاں عوامی سرگرمیاں مرکوز ہیں۔گوادر پرو کے مطابق ان میں سے 18 کھمبے ایسٹ بے ایکسپریس وے کے جنکشن پر جیٹی کے ساتھ، 19 کھمبے میرین ڈرائیو کے ساتھ مغربی خلیج پر فش لینڈنگ ایریا پر، 26 کھمبے فش ہاربر (جیٹی) پر اور 10 کھمبے ڈسٹرکٹ ہیڈ کوارٹر ہسپتال (ڈی ایچ کیو) نصب کیے گئے۔

(جاری ہے)

میری ٹائم ڈرائیو کے قریب ایک مقامی رہائشی علی بلوچ نے گوادر پرو کو بتایا کہ اس سے پہلے ان مقامات پر مقامی مسافروں کے لیے ایسی سہولیات دستیاب نہیں تھیں۔ انہوں نے اس بات پر زور دیا کہ مقامی کمیونٹی اور اس میں شامل چینی کمپنیوں دونوں کی طرف سے بنیادی ڈھانچے کو بہتر بنانے کی ضرورت کو واضح طور پر تسلیم کیا گیا ہے۔ مزید برآں انہوں نے اس امید کا اظہار کیا کہ شمسی توانائی سے چلنے والی اسٹریٹ لائٹس کی تنصیب سے تجارتی سرگرمیاں، خاص طور پر ماہی گیری سے متعلق سرگرمیاں دن بھر جاری رہ سکیں گی۔

گوادر پرو کے مطابق دریں اثنا، 2022 میں چینی سفارت خانے اور چین کی ماحولیات کی وزارت کے تعاون سے چینی کمپنیوں کی جانب سے مقامی رہائشیوں کو ان کے گھروں کے لیے سولر فوٹو وولٹک سسٹم اور ایل ای ڈی لائٹس کے 4,000 سیٹ عطیہ کیے گئے۔ یہ اضافی اقدام گوادر میں مقامی آبادی کی زندگیوں کو بہتر بنانے کے لیے چین کے عزم کو مزید واضح کرتا ہے۔