کیسی ریاست ہے جہاں فون سننا بھی آسان نہیں ،محفوظ مقام ڈھونڈناپڑتا ہے،جسٹس منصورعلی شاہ

منگل 30 اپریل 2024 20:57

اسلام آباد(اُردو پوائنٹ اخبارتازہ ترین - آن لائن۔ 30 اپریل2024ء) فون ٹیپ کیے جانے کی سپریم کورٹ میں بازگشت ،جسٹس منصور علی شاہ نے بھی شکوہ کردیا۔اسلام آباد ہائیکورٹ کے 6ججز کے خط پرازخودنوٹس کیس کی سماعت کے دوران جسٹس منصور علی شاہ نے کہاکہ یہ کیسی ریاست ہے جہاں فون سننا بھی آسان نہیں فون سنتے ہوئے بھی خوف ہوتاکہ کہیں ٹیپ تو نہیں ہو رہا فون پر بات کرنے کیلئے محفوظ مقام ڈھونڈنا پڑتا ہے۔

(جاری ہے)

سپریم کورٹ میں چیف جسٹس قاضی فائز عیسیٰ کی سربراہی میں 6رکنی بنچ نے ججز کے خط پر ازخودنوٹس کیس کی سماعت ہوئی،جسٹس منصور علی شاہ نے استفسار کیا کہ یہ کیا ہورہا ہے فون رکھ کر بات کرو، یہ کس قسم کا کلچر ہی مجھے کوئی دیکھ رہا ہے، کوئی نوٹ کر رہا ہے، کمرے میں ڈیوائس لگی ہے، یہ کیوں ہوتا ہی کیا ایسا نہیں ہونا چاہئے کیا ایک جمہوری ملک میں ایسا کلچر ہونا چاہئے۔جسٹس منصور علی شاہ نے کہاکہ یہ کیسی ریاست ہے جہاں فون سننا بھی آسان نہیں فون سنتے ہوئے بھی خوف ہوتاکہ کہیں ٹیپ تو نہیں ہو رہا فون پر بات کرنے کیلئے محفوظ مقام ڈھونڈنا پڑتا ہے۔