علاقائی خطرات سے نمٹنے کے لیے ہمارا اور پاکستان کا مفاد مشترکہ ہے، امریکا

بدھ 1 مئی 2024 13:48

واشنگٹن (اُردو پوائنٹ اخبارتازہ ترین - این این آئی۔ 01 مئی2024ء) امریکا نے کہا ہے کہ علاقائی سلامتی کو لاحق خطرات سے نمٹنے کے لیے پاکستان اور امریکا کا مفاد مشترکہ ہے۔وائس آف امریکا کی رپورٹ کے مطابق محکمہ خارجہ میں بریفنگ کے دوران پاکستان سے متعلق پوچھے گئے سوال کے جواب میں محکمہ خارجہ کے نائب ترجمان ویدانت پٹیل نے بتایا کہ ہم دہشت گردی سے نمٹنے اور اپنے شہریوں کے تحفظ کو یقینی بنانے کے لیے پاکستان کی کوششوں کی حمایت کرتے ہیں۔

ترجمان نے کہا کہ امریکا کے سیکیورٹی معاملات میں پاکستان کے ساتھ شراکت داری میں اعلٰی سطحی انسدادِ دہشتگردی ڈائیلاگ اور دہشتگردی کے تدارک کے لیے مالی اعانت شامل ہیں۔انہوںنے کہاکہ امریکا اور پاکستان کے درمیان ملٹری ٹو ملٹری رابطوں کو فروغ دینا بھی ہماری شراکت داری میں شامل ہے۔

(جاری ہے)

ویدانت پٹیل سے سکھ رہنما کے قتل کی سازش کا وزیرِ اعظم مودی کے قریبی حلقوں اور خفیہ ایجنسی را کے چیف کو علم ہونے سے متعلق واشنگٹن پوسٹ کی رپورٹ پر بھی سوال کیا گیا جس پر نائب ترجمان نے کہا کہ ہم بھارت کی جانب سے اس معاملے پر کروائی گئی تحقیقات کی روشنی میں بھارت سے جواب دہی کی توقع کرتے ہیں۔

واضح رہے کہ گزشتہ برس امریکی حکام نے اپنی سرزمین پر ایک سکھ رہنما کو قتل کرنے کی سازش کو ناکام بنانے کا دعویٰ کیا تھا جس میں حکام کے بقول بھارتی عہدیدار ملوث تھے۔