مذاکرات ہی موجودہ بحران سے نکلنے کا واحد راستہ، عمران خان اپنی ذات کیلئے نہیں ملک و قوم کیلئے مذاکرات پر رضامند ہوئی: چودھری پرویزالٰہی

پیر 13 مئی 2024 22:40

!لاہور (اُردو پوائنٹ اخبارتازہ ترین - آن لائن۔ 13 مئی2024ء) پاکستان تحریک انصاف کے مرکزی صدر چودھری پرویزالٰہی نے اینٹی کرپشن عدالت میں پیشی پر صحافیوں سے غیر رسمی گفتگو میں کہا ہے کہ مذاکرات ہی موجودہ بحران سے نکلنے کا واحد راستہ ہیں، عمران خان اپنی ذات کیلئے نہیں، ملک و قوم کیلئے مذاکرات پر رضامند ہوئے ہیں، صرف بااختیار مقتدر حلقوں سے مذاکرات ہی نتیجہ خیز ثابت ہو سکتے ہیں، بااختیار مقتدر حلقوں کو سابق صدر عارف علوی کی مذاکرات کی دعوت کا مثبت جواب دینا چاہئے، موجودہ حالات میں مذاکرات سے انکار ملک و قوم کے ساتھ خیر خواہی نہیں ہو گی۔

چودھری پرویزالٰہی نے کہا کہ ن لیگ، پی ٹی آئی اور اسٹیبلشمنٹ کے درمیان مذاکرات کو سبوتاژ کر رہی ہے، اس لیے کہ فارم 47 والی حکومت خود ہی شرماتی پھرتی ہے، پی ٹی آئی اور اسٹیبلشمنٹ مذاکرات کے نتیجہ میں ن لیگ کو پی ٹی آئی کا چوری شدہ مینڈیٹ واپس کرنا پڑے گا، ن لیگ کو پی ٹی آئی اسٹیبلشمنٹ مذاکرات میں اپنی سیاسی موت نظر آتی ہے۔

(جاری ہے)

انہوں نے کہا کہ کسان گندم بیچنے کیلئے رل رہے ہیں، ٹک ٹاک حکومت لمبی تان کر سوئی ہوئی ہے، ہر بات میں زیرو ٹالرنس کے دعویداروں کی زیرو پرفارمنس سب کے سامنے ہے، سپریم کورٹ کے فیصلے کے بعد ناجائز حکومت غیر قانونی سیٹوں اور اکثریت سے ہاتھ دھو بیٹھی ہے۔

چودھری پرویزالٰہی نے کہا کہ پاک فوج سمیت آئینی اداروں کے خلاف سب سے زیادہ زہر اگلنے والی جماعت ن لیگ ہے، عمران خان کی قیادت میں پی ٹی آئی متحد ہے، ن لیگی رہنما جھوٹے پراپیگنڈے کے ذریعے اداروں اور پی ٹی آئی میں تصادم سے باز رہیں۔