گیری کرسٹن 19 مئی کو پاکستان ٹیم جوائن کرلیں گے، پی سی بی

اسلام آباد (اُردو پوائنٹ اخبارتازہ ترین - این این آئی۔ 14 مئی2024ء) پاکستان کرکٹ بورڈ (پی سی بی)نے کہا ہے کہ گیری کرسٹن پاکستان ٹیم کے وائٹ بال ہیڈ کوچ کے طور پر اپنی دو سالہ مدت کا آغاز کرنے کیلئے 19 مئی کو لیڈز میں پاکستان ٹیم کو جوائن کرلیں گے۔ پی سی بی کے مطابق گیری کرسٹن 22 مئی کو ہیڈنگلے میں انگلینڈ کے خلاف چار میچوں کی ٹی ٹوئنٹی سیریز کے آغاز سے تین دن قبل ٹیم میں شامل ہونگے۔

اس سیریز کے بعد پاکستان کرکٹ ٹیم امریکا اور ویسٹ انڈیز میں منعقدہ آئی سی سی مینز ٹی ٹوئنٹی ورلڈکپ 2024 میں حصہ لے گی جس میں پاکستان ٹیم 6 جون کو ڈیلاس میں اپنے افتتاحی میچ میں میزبان امریکا کا مقابلہ کرے گی۔جنوبی افریقہ سے تعلق رکھنے والے 56 سالہ گیری کرسٹن کو گزشتہ ماہ وائٹ بال کا ہیڈ کو چ مقرر کیا گیا تھا جبکہ آسٹریلیا کے جیسن گلیسپی کی تقرری ریڈ بال کے ہیڈ کوچ کی حیثیت سے کی گئی تھی۔

(جاری ہے)

جیسن گلیسپی اگست میں بنگلادیش کے خلاف آئی سی سی ورلڈ ٹیسٹ چیمپئن شپ کی سیریز سے قبل جولائی میں پاکستان پہنچ کر ذمہ داری سنبھالیں گے۔اگلے ماہ ہونے والے آئی سی سی مینز ٹی ٹوئنٹی ورلڈ کپ 2024 اور دیگر دو طرفہ وائٹ بال سیریز کے علاوہ گیری کرسٹن پاکستان میں آئی سی سی چیمپئنز ٹرافی 2025، بھارت اور سری لنکا میں ہونے والے آئی سی سی مینز ٹی ٹوئنٹی ورلڈکپ 2026 اور اے سی سی ٹی ٹوئنٹی ایشیا کپ 2025 میں بھی پاکستان ٹیم کے ہیڈ کوچ ہوں گے۔

گیری کرسٹن نے کہاکہ میں پاکستان کی مینز کرکٹ ٹیم کے ساتھ اس نئے سفر کا آغاز کرنے کیلیے پرجوش ہوں۔ ایسی باصلاحیت اور متحرک ٹیم کی کوچنگ کرنا اعزاز کی بات ہے اور میں بین الاقوامی سطح پر ان کی کامیابی میں اپنا کردار ادا کرنے کیلئے بے چین ہوں۔انہوں نے کہا کہ یہ پاکستان کرکٹ کیلیے واقعی سنسنی خیز لمحات ہیں، ایک نئی انتظامیہ اور کھلاڑی ٹھوس نتائج دینے کیلیے پرعزم ہیں۔

آنے والا آئی سی سی مینز ٹی ٹوئنٹی ورلڈکپ 2024 ہمارے لیے اپنی صلاحیتوں کا مظاہرہ کرنے اور کرکٹ میں ایک مضبوط قوت کے طور پر پاکستان کی پوزیشن کو برقرار رکھنے کا ایک شاندار موقع پیش کر رہا ہے تاہم کامیابی کے لیے اجتماعی کوشش، منصوبہ بندی اور ایک دوسرے کے لیے غیر متزلزل تعاون کی ضرورت ہوگی۔انہوںنے کہاکہ 19 دیگر ٹیمیں ٹائٹل کیلئے کوشاں ہیں،ہمیں اپنی امنگوں کو پورا کرنے کیلیے اپنے حریفوں کو مستقل مزاجی کا مظاہرہ کرتے ہوئے پیچھے چھوڑنا چاہیے۔

گیری کرسٹن نے کہا کہ میں ٹیم کے ساتھ مل کر ان کے کھیل کو بلند کرنے اور دنیا بھر کے شائقین کیلیے خوشی لانے کیلیے پرعزم ہوں۔ تسلسل اور مستقل مزاجی میرے لیے اہم ہے۔ میں کھلاڑیوں کو سپورٹ کرنے اور انہیں وہ اعتماد فراہم کرنے پر یقین رکھتا ہوں جس کی انہیں بہترین کارکردگی کیلیے ضرورت ہے۔وائٹ بال ہیڈ کوچ نے کہا کہ یقین رکھیں ایک بار جب میں نے کسی کھلاڑی کو سپورٹ کرنے کا فیصلہ کر لیا تو میں ان کے ساتھ کھڑا رہوں گا ایک ایسے ماحول کو فروغ دینے کیلئے کہ جس میں وہ آگے بڑھ سکیں۔

دریں اثنا، پی سی بی نے ٹیم انتظامیہ کی تجویز پر سائمن ہیلمٹ (فیلڈنگ کوچ)اور ڈیوڈ ریڈ (مینٹل پرفارمنس کوچ)کو پلیئر سپورٹ اسٹاف میں شامل کرلیا۔ڈیوڈ ریڈ 20 مئی کو ٹیم کو جوائن کریں گے اور آئی سی سی مینز ٹی ٹوئنٹی ورلڈ کپ 2024 تک ذمہ داری نبھائیں گے جبکہ سائمن ہیلمٹ 31 مئی کو ٹیم کو جوائن کریں گے۔آفتاب خان جو اس وقت ٹیم کے فیلڈنگ کوچ کے طور پر خدمات انجام دے رہے ہیں، ہیلمٹ کی آمد کے بعد آئی سی سی مینز ٹی ٹوئنٹی ورلڈکپ کے لیے ہائی پرفارمنس کوچ کی ذمہ داریاں سنبھالیں گے۔