یونائٹیڈ بزنس گروپ کا نجکاری اور شفافیت کے لیے حکومت کے عزم کا خیر مقدم

کراچی (اُردو پوائنٹ اخبارتازہ ترین - این این آئی۔ 17 مئی2024ء) یونائیٹڈ بزنس گروپ (یو بی جی) کے رہنماؤں اور اراکین ایس ایم تنویر، زبیر طفیل، حنیف گوہر، سید مظہر ناصراورمومن علی ملک نے وزیر اعظم پاکستان کے تمام سرکاری اداروں (ایس او ای) کی نجکاری کے فیصلے کا خیرمقدم کیا ہے۔یو بی جی نے کہا ہے کہ حکومت کے شفاف عمل کے عزم کے ساتھ ساتھ اس اقدام کو پاکستان بھر کی تاجر برادری قدر کی نگاہ سے دیکھتیہے۔

یو بی جی کے رہنماؤں نے پاکستان انٹرنیشنل ایئرلائنز اور دیگر اداروں کی نجکاری کے لئے بولی اور دیگر طریقہ کار کو براہ راست نشر کرنے کے حکومتی فیصلے کو سراہا جس سے کاروباری برادری کے اعتماد میں اضافہ ہوگا اور پاکستان کا امیج بہتر ہوگا۔یو بی جی کے رہنماؤں نے ایک بار پھر اپنے اس خیال کو دہرایا کہ حکومت کا کردار سرمایہ کاروں کو سہولت فراہم کرنا ہے، کاروبار چلانا نہیں ہے۔

(جاری ہے)

انہوں نے یہ بھی کہا ہے کہ SOEs کی نجکاری ٹیکس دہندگان کے پیسے کی بچت کرے گی، جس سے حکومت لوگوں کو معیاری خدمات فراہم کرنے کے قابل بنائے گی، خاص طور پر صحت، تعلیم اور نقل و حمل میں، جو ایک اسلامی ریاست کے لیے ضروری ہے۔ یونائٹیڈ بزنس گروپ نے بجلی کی تقسیم کار کمپنیوں کو 2024-29 کے نجکاری پروگرام میں شامل کرنے، خسارے میں جانے والے SOEs کی نجکاری کو ترجیح دینے، اور نجکاری کے تیز اور شفاف عمل کے لیے منصوبہ بندی کمیشن میں ماہرین کے ایک پری کوالیفائیڈ پینل کو مقرر کرنے کے اعلان کا بھی خیر مقدم کیا ہے۔

مزید برآں، گوادر بندرگاہ کو مکمل طور پر فعال اور موثر بنانے، اور اس بات کو یقینی بنانے کے لیے کہ ملک کی درآمدات کا ایک حصہ بندرگاہ کے ذریعے پہنچایا جانے کو بھی یو بی جی کے رہنماؤں نے سراہا ہے جبکہ سی پیک کے دوسرے مرحلے پر تیزی سے عملدرآمد کا بھی تاجر برادری نے خیرمقدم کیا ہے۔ علاوہ ازیں یو بی جی کے رہنماؤں نے مقامی اور غیر ملکی سرمایہ کاری کو راغب کرنے، روزگار کے مواقع پیدا کرنے، اور کراچی کے سات صنعتی زونز میں مطلوبہ بنیادی ڈھانچے کی ترقی کے لیے سالانہ ترقیاتی منصوبے میں فنڈز مختص کرنے کے لیے نئے صنعتی زونز کے قیام کے حکومت سندھ کے فیصلے کو سراہا جس سے صوبے میں موجودہ صنعتکاروں کو تقویت فراہم ہوسکے گی۔