وزیر اعظم آزاد کشمیر کے خلاف توہین عدالت درخواست سماعت کیلئے مقرر کردی گئی

اسلام آباد (اُردو پوائنٹ اخبارتازہ ترین - این این آئی۔ 18 مئی2024ء) وزیر اعظم آزاد کشمیر چوہدری انوار الحق کیخلاف سپریم کورٹ میں دائر توہین عدالت درخواست سماعت کیلئے مقرر کردی گئی۔ تفصیلات کے مطابقوزیر اعظم آزاد کشمیر چوہدری انوار الحق کیخلاف سپریم کورٹ میں دائر توہین عدالت درخواست سماعت کیلئے مقرر کردی گئی۔سماجی کارکن عمامہ گلریز سمیت دو وکلاء راجا عبدالحمید اور سید علی زین کاظمی کی جانب سے دائر درخواست میں موقف اپنایا گیا ہے کہ چوہدری انوار الحق ہائی کورٹ آزاد جموں کشمیر کے فیصلے کی خلاف ورزی کے مرتکب ہوئے ہیں۔

درخواست میں کہا گیا ہے کہ سی بی آر نے عدالتی ملازمین کے جوڈیشنل الائونس میں ٹیکس کی مد میں کٹوتی کی تھی جس کو سپریم کورٹ نے کالعدم قرار دیا تھا اور کمشنر ان لینڈ ریوینیو کو کاٹی گئی رقم عدالتی ملازمین کو واپس کرنے کی ہدایت کر رکھی ہے۔

(جاری ہے)

درخواست میں کہا گیا ہے کہ کمشنر ان لینڈ ریوینیو نے عدالت کے حکم پر عمل نہیں کیا اور وزیر اعظم آزادکشمیر نے عدالت عالیہ کی توہین عدالت کیس میں ملوث کمشنر ان لینڈ ریونیو نارتھ راجا اشتیاق احمد کو عدالتی اسٹے آرڈر کے باوجود تبدیل کر دیا۔

درخواست گزاروں نے کہا ہے کہ وزیراعظم انوار الحق نے عدالتی احکامات کی خلاف ورزی کرتے ہوئے کمشنر ان لینڈ ریوینیو کو تبدیل کر دیا اور ان کی جگہ نئی تعیناتی بھی نہیں کی۔درخواست میں کہا گیا ہے کہ حکومت عدالتی ملازمین کے الاونسز سے کی گئی ٹیکس کٹوتی واپس نہیں کرنا چاہتی اور عدالتی حکم کی خلاف ورزی کر رہی ہے۔سپریم کورٹ آزاد کشمیر نے درخواست منظور کرتے ہوئے وزیر اعظم انوار الحق سمیت تمام فریقین کو نوٹسز جاری کر تے ہوئے کیس 21 مئی کو سماعت کیلئے مقرر کردیا۔