بھارت میں شدید گرمی، 72 گھنٹوں میں مزید 8 افراد ہلاک

ریاست اڑیسہ میں یکم مارچ سے اب تک 41 افراد ہلاک ہو چکے ہیں،رپورٹ

منگل 11 جون 2024 16:29

نئی دہلی (اُردو پوائنٹ اخبارتازہ ترین - این این آئی۔ 11 جون2024ء) بھارت کی ریاست اڑیسہ میں شدید گرمی کے باعث 72 گھنٹوں میں مزید 8 افراد ہلاک ہو گئے۔بھارتی میڈیا کے مطابق اڑیسہ میں یکم مارچ سے اب تک گرمی کی شدید لہر سے 41 افراد ہلاک ہو چکے ہیں۔بھارتی محکمہ موسمیات نے اڑیسہ میں مزید 4 روز تک ہیٹ ویو جاری رہنے کی پیش گوئی کی ہے۔

(جاری ہے)

بھارتی میڈیا کے مطابق محکمہ موسمیات نے جھارکھنڈ، اتراکھنڈ، پنجاب، ہریانہ، نئی دہلی اور مغربی اتر پردیش کے کئی علاقوں میں آج ہیٹ ویو کی پیش گوئی کی ہے۔

نئی دلی میں 13 جون تک شدید گرمی کا اورنج الرٹ جاری کر دیا گیا ہے، جہاں درجہ حرارت 44 ڈگری سینٹی گریڈ تک جانے کا امکان ہے، نئی دہلی میں یکم مئی سے 10 جون کے درمیان 40 دنوں میں سے 32 دنوں میں زیادہ سے زیادہ درجہ حرارت 40 ڈگری سے زیادہ ریکارڈ کیا گیا۔محکمہ موسمیات کا کہنا تھا کہ بھارتی ریاست گجرات میں 48 گھنٹوں میں مون سون سیزن شروع ہونے کا امکان ہے۔