مسیحی برادری کا قومی اسمبلی سے اقلیتوں کے حقوق کے تحفظ کی قرارداد کی کثرت رائے سے منظوری کاخیرمقدم

بدھ 26 جون 2024 17:04

اسلام آباد (اُردو پوائنٹ اخبارتازہ ترین - اے پی پی۔ 26 جون2024ء) مسیحی برادری نے قومی اسمبلی کی جانب سے اقلیتوں کے حقوق کے تحفظ کی قرارداد کی کثرت رائے سے منظوری کا خیرمقدم کیا ہے اور مطالبہ کیا ہے کہ جسٹس تصدق حسین جیلانی کے اقلیتوں کے حقوق کے تحفظ کے پیش کردہ نکات پر بھی عملدرآمد کروایا جائے ۔

(جاری ہے)

مسیحی روحانی پیشوا و آرچ بشپ راولپنڈی /اسلام آباد ڈاکٹر جوزف ارشد نے کہاکہ قومی اسمبلی کی جانب سے اقلیتوں کے حقوق کے تحفظ کی قرارداد کی کثرت رائے سے منظوری خوش آئند ہے اور مسیحی برادری یہ قرارداد پیش کرنے پر وفاقی وزیر قانون اعظم نذیر تارڑ اور ایوان کی جانب سے منظور کرنے پر کابینہ کے اراکین کے ساتھ ساتھ حکومت پاکستان کی شکر گذار ہے ۔

ڈاکٹر جوزف ارشد نے کہاکہ پاکستانی مسیحی برادری یہ مطالبہ بھی کرتی ہے کہ جسٹس تصدق حسین جیلانی کے اقلیتوں کے حقوق کے تحفظ کے پیش کردہ نکات پر بھی عملدرآمد کروایاجائے ۔انہوں نے کہاکہ تمام شہریوں کو مساوی حقوق کی فراہمی یقینی بنا کر ہی وطن عزیز کی ترقی و خوشحالی ممکن ہے ۔