کتوں کو مارنے کی تصدیق ہوئی تو ایف آئی آر درج ہوگی، اسلام آباد ہائیکورٹ

جمعرات 16 اکتوبر 2025 16:13

اسلام آباد (اُردو پوائنٹ اخبارتازہ ترین - این این آئی۔ 16 اکتوبر2025ء) اسلام آباد ہائیکورٹ میں وفاقی دارالحکومت میں آوارہ کتوں کے خاتمے اور نسل کشی کے خلاف کیس کی سماعت میں جسٹس خادم حسین سومرو نے ریمارکس دیے ہیں کہ اگر کتوں کو مارنے کی تصدیق ہوئی تو ایف آئی آر درج ہوگی، عدالت نے سی ڈی اے اور میونسپل کارپوریشن سے جواب طلب کرلیا۔اسلام آباد میں آوارہ کتوں کے خاتمے اور نسل کشی کے خلاف کیس کی سماعت ہوئی، 9 اکتوبر کو مردہ کتوں کو دیکھنے والی عینی شاہد خاتون عدالت میں پیش ہوگئیں، عدالت نے مردہ کتوں کو گاڑی میں دیکھنے والی عینی شاہد خاتون کا بیان ریکارڈ کا حصہ بنا دیا۔

خاتون نے عدالت کو بتایا کہ 9 اکتوبر کو اسلام آباد میں سی ڈی اے آفس کے پاس ایک گاڑی دیکھی ، جس میں سیکڑوں کتے مرے ہوئے پڑے تھے۔

(جاری ہے)

جسٹس خادم حسین سومرو نے کہا کہاگر کتوں کو مارنے کی تصدیق ہوئی تو ایف آئی آر درج ہوگی ، وکیل التمش سعید نے عدالت کو آگاہ کیا کہ اسلام آباد میں سی ڈی اے اور میونسپل کارپوریشن کتوں کو پکڑ کر گولی ماردیتے ہیں، اس عمل کو روکنے کے حوالے سے 2020 میں ایک پالیسی بنی تھی ، عدالت متعلقہ حکام سے وضاحت طلب کرے اور اس عمل کو روکے۔عدالت نے درخواست گزار نیلوفر کی مرکزی کیس میں فریق بننے کی متفرق درخواست منظور کرتے ہوئے 9 اکتوبر کے واقعے پر جواب طلبی کے لیے سی ڈی اے اور میونسپل کارپوریشن کو نوٹس جاری کردیے اور سماعت ملتوی کردی۔