عاشورہ کے موقع پر ہمیں مختلف مکاتب ِفکر کے درمیان مکالمے اور افہام و تفہیم کی اہمیت کو بھی یاد رکھنا چاہیے، یوسف رضا گیلانی

منگل 16 جولائی 2024 16:00

اسلام آباد (اُردو پوائنٹ اخبارتازہ ترین - این این آئی۔ 16 جولائی2024ء) چیئرمین سینیٹ سید یوسف رضا گیلانی نے یوم عاشورہ کے موقع پر اپنے پیغام میں کہا ہے کہ یہ دن اسلامی تاریخ میں نہایت اہمیت کا حامل ہے کیونکہ اس دن کربلا کے میدان میں حق وباطل کی لڑائی میں اسلامی اقدار کے تحفظ کی خاطر نواسہ رسول صلی اللہ علیہ وسلم سیدنا امام حسین رضی اللہ عنہ اور ان کے رفقاء نے عظیم قربانی دی،یہ معرکہ اسلام کی میراث، سربلندی اور دین کی حرمت و حفاظت کے لئے جدوجہد تھا جو امام حسینؓ اور ان کے رفقاء کے اصولی مؤقف، غیر متزلزل عزم، بہادری اور قربانی سے عبارت ہوا۔

حضرت امام حسین رضی اللہ عنہ اور ان کے ساتھیوں کی جانب سے دی گئی عظیم قربانیوں سے ہمیں زندگی کے ہر شعبے میں رہنمائی ملتی ہے اگر ہم ان کی جدوجہد کے پہلوؤں کو ملحوظ خاطر رکھ کر اپنے مستقبل کا تعین کریں تو درپیش تمام مسائل پر آسانی سے قابو پایا جا سکتا ہے۔

(جاری ہے)

حضرت امام حسین رضی اللہ عنہ کے اس جرات مندانہ عمل سے ہمیں یہ سبق ملتا ہے کہ ہمیں ظلم و ناانصافی کے سامنے کبھی جھکنا نہیں چاہئے بلکہ اس کے خلاف ڈٹ کر کھڑے ہونا چاہے اس کے لیے کتنی ہی قیمت کیوں نہ ادا کرنی پڑے۔

سید یوسف رضا گیلانی نے کہا کہ عاشورہ کے موقع پر ہمیں مختلف مکاتب ِفکر کے درمیان مکالمے اور افہام و تفہیم کی اہمیت کو بھی یاد رکھنا چاہیے۔ آئیے، ہم اسلام کے بنیادی اصولوں صبر و برداشت، ہمدردی، رواداری، مشاورت اور سماجی انصاف کے فروغ کیلئے اپنے عزم کی تجدید کریں اور امام حسینؓ کی تعلیمات کے مطابق اپنی زندگیوں کو ڈھال کر دنیا و آخرت کی کامیابی حاصل کریں۔انہوںنے کہاکہ میں تمام پاکستانیوں سے اپیل کرتا ہوں کہ متحد ہو کرملک ِپاکستان کی ترقی و خوشحالی کیلئے کام کریں۔ اللہ تعالی ہمیں حضرت امام حسین ؓاور انکے رفقاء کی عظیم قربانیوں سے سبق حاصل کرنے اور ہمت، استقامت کے ساتھ آگے بڑھنے کی توفیق عطا فرمائے۔ آمین!