پی ٹی آئی پر پابندی لیگی رہنماؤں کا صرف خواب رہ گیا‘بیرسٹر سیف

بانی پی ٹی آئی جعلی فارم 47 اور مینڈیٹ چور شریف خاندان کی طرح لندن بھاگنے والوں میں سے نہیں

ہفتہ 3 اگست 2024 12:47

پشاور(اُردو پوائنٹ اخبارتازہ ترین - این این آئی۔ 03 اگست2024ء) مشیر اطلاعات خیبر پختونخوا بیرسٹر ڈاکٹر سیف نے کہا ہے کہ پی ٹی آئی پر پابندی لیگی رہنماؤں کا صرف خواب رہ گیا۔ اپنے ایک بیان میں بیرسٹر سیف کا کہنا تھا کہ مینڈیٹ چور ن لیگ عمران خان سے جیل میں بھی خوفزدہ ہے، ان کے بیان سے مینڈیٹ چوروں کی دوڑیں لگ جاتی ہیں، بانی پی ٹی آئی جعلی فارم 47 اور مینڈیٹ چور شریف خاندان کی طرح لندن بھاگنے والوں میں سے نہیں۔

(جاری ہے)

انہوں نے کہا کہ پی ٹی آئی پر پابندی لیگی رہنماؤں کا صرف خواب رہ گیا، عمران خان اور پی ٹی آئی کے خلاف جعلی سرکار کی تمام سازشیں ناکام ہو چکی ہیں۔رہنما پی ٹی آئی کا کہنا تھا کہ عمران خان، پی ٹی آئی رہنما، کارکن ملک میں آئین اور قانون کی بالادستی کی جنگ لڑ رہے ہیں، فارم 47 جعلی سرکار شکست تسلیم کر کے قوم سے معافی مانگ کر فوراً استعفیٰ دیں بصورت دیگر ان کا آخری انجام انتہائی ناگفتہ بہ ہوگا۔ بیرسٹر سیف نے مزید کہا کہ ملکی ترقی کا واحد حل جعلی فارم 47 حکومت کا خاتمہ اور نئے شفاف انتخابات ہیں۔