صدر سے چیئرمین مرکزی ریت ہلال کمیٹی مولانا سید محمدعبدالخبیر آزاد کی ملاقات

اسلام آباد(اُردو پوائنٹ اخبارتازہ ترین - این این آئی۔ 08 ستمبر2024ء) صدر اسلامی جمہوریہ پاکستان آصف علی زرداری سے چیئرمین مرکزی ریت ہلال کمیٹی پاکستان /خطیب وامام بادشاہی مسجد لاہور سفیرامن مولانا سید محمدعبدالخبیر آزاد نے ایوان صدر میں ملاقات کی، جس میں ملک پاکستان میں قیام امن،دہشت گردی،فرقہ واریت کے خاتمے،مذہبی ہم آہنگی، پیغام پاکستان کے فروغ اور باہمی دلچسپی کے امور پر تبادلہ خیال کیا گیا۔

صدر پاکستان آصف علی زرداری نے کہا کہ بین المسالک و بین المذاہب ہم آہنگی اورامت کے درمیان وحدت کی اشد ضرورت ہے،تمام علما کرام و مشائخ عظام مذہبی ہم آہنگی،رواداری اور پیغام پاکستان کے فروغ کیلئے اپنا عظیم کردار اداکریں،ہمارا دشمن بڑا عیار و چالاک ہے،پاکستان میں بدامنی پھیلا کر انتشار پیدا کر کے قومی یکجہتی کو نقصان پہنچانا چاہتا ہے،موجودہ ملکی حالات میں ہم سب نے ملکر اپنے وطن عزیز پاکستان کو بچانا ہے اور اپنا کلیدی کردار ادا کرنا ہے،ہم سب ملکر دشمن کے ناپاک ایجنڈے کو ناکام بنائیں گے،ہم سب پاکستانی ہیں،صدر پاکستان آصف علی زرداری نے سفیرامن مولانا سید محمد عبدالخبیر آزاد کی ریت ہلال اور دنیا بھر میں مذہبی ہم آہنگی،اتحاد و وحدت کے حوالے سے خدمات کو سراہا۔

(جاری ہے)

سفیرامن مولانا سید محمد عبدالخبیر آزاد نے دوران ملاقات گفتگو کرتے ہوئے کہا کہ پیغام پاکستان،پاکستان کاو ہ عظیم بیانیہ ہے جس نے دہشت گردی،انتہا پسندی اور فرقہ واریت کو حرام قرار دیا ہے،موجودہ ملکی حالات میں بین المسالک و بین المذاہب ہم آہنگی،رواداری اور قومی یکجہتی کیلئے ہم سب کو اہم کردار ادا کرنا ہوگا،دہشت گردی،انتہا پسندی کے خاتمے کیلئے پوری قوم اپنی بہادر مسلح افواج اور سکیورٹی اداروں کے ساتھ کھڑی ہے،7ستمبر 1974 قومی اسمبلی کے علما کرام و اراکین اسمبلی اوروزیر اعظم ذوالفقار علی بھٹو شہید کاتحفظ ختم نبوتؓ کے بل کو منظور کرانا ایک تاریخ ساز فیصلہ تھا،مولانا سیدمحمد یوسف بنوری، مفتی محمود،مولانا عبدالحق حقانی،مولانا غلام غوث ہزاروی،علامہ شاہ احمد نورانی،مولانا عبدالستار نیازی،پروفیسر غفور احمد،امام السلاطین مولانا ڈاکٹرسید محمد عبدالقادر آزاد،مولانا کوثر نیازی ودیگر علما کرام ومشائخ عظام کی ختم نبوت ؓ کے حوالے سے عظیم خدمات کو ہم خراج تحسین پیش کرتے ہیں۔

اس موقع پر سفیرامن مولانا سید محمد عبدالخبیر آزاد نے صدر پاکستان آصف علی زرداری کا شکریہ ادا کیا اور کہا کہ اللہ تعالی وطن عزیز پاکستان کی حفاظت فرمائے اور دن دگنی رات چگنی ترقی عطا فرمائے۔