ذاتیات پر حملے کر کے ہیرو بنتے شرم آنی چاہیے‘عظمیٰ بخاری

ایک صوبے کا وزیرِ اعلیٰ دوسرے صوبے پرچڑھائی کی باتیں کر کے بغاوت کو ہوا دے رہا ہے‘بیان جاری

جمعرات 12 ستمبر 2024 22:16

ذاتیات پر حملے کر کے ہیرو بنتے شرم آنی چاہیے‘عظمیٰ بخاری

لاہور(اُردو پوائنٹ اخبارتازہ ترین - آن لائن۔ 12 ستمبر2024ء) وزیرِ اطلاعات پنجاب عظمیٰ بخاری نے کہا کہ ایک صوبے کا وزیرِ اعلیٰ دوسرے صوبے پرچڑھائی کی باتیں کر کے بغاوت کو ہوا دے رہا ہے۔ عظمیٰ بخاری نے اپنے بیان میں کہا ہے کہ پہلی ناکام بغاوت کے ثمرات ابھی تک ملک اور ان کی جماعت بھگت رہی ہے، سیاسی میدان اور کارکردگی میں مقابلہ کرنے کے بجائے ذاتیات پر حملے کر کے ہیرو بنتے شرم آنی چاہیے۔

(جاری ہے)

اُنہوں نے کہا کہ اڈیالہ جیل کے قیدی کی سوچ صوبوں کو آپس میں لڑوانا ہے، صوبائیت اور لسانی کارڈ اڈیالہ جیل کے قیدی کے اپنے گلے پڑیں گے۔وزیرِ اطلاعات پنجاب نے کہا کہ پاکستان میں پچھلے 6 سال میں جو بھی ترقی کی راہ میں رخنے ڈالے گئے وہ ایک ہی جماعت نے ڈالے۔اُنہوں نے مزید کہا کہ جس صوبے میں ان کی 11 سال سے حکومت ہے وہاں بے روزگاری، غربت، مہنگائی عروج پر ہے۔عظمیٰ بخاری نے یہ بھی کہا کہ کے پی اسمبلی میں وزیرِ اعلیٰ کے خلاف آوازیں اٹھ رہی ہیں۔