ٹرمپ پر دوسرا قاتلانہ حملہ، رائفل چھوڑ کر فرار ہوا مشتبہ شخص گرفتار

فلوریڈا کے گالف کلب میں ٹرمپ پر حملہ مبینہ قاتلانہ کوشش تھی،ایف بی آئی

پیر 16 ستمبر 2024 18:05

واشنگٹن (اُردو پوائنٹ اخبارتازہ ترین - این این آئی۔ 16 ستمبر2024ء) ریپبلیکن صدارتی امیدوار ڈونلڈ ٹرمپ پر فلوریڈا میں پیش آئے فائرنگ کے تازہ ترین واقعے میں سابق امریکی صدر پر قاتلانہ حملے کی کوشش پر مشتبہ شخص کو گرفتار کر لیا گیا۔غیر ملکی خبر ایجنسی کے مطابق اس حوالے سے ایف بی آئی کا کہنا تھا کہ فلوریڈا کے گالف کلب میں ٹرمپ پر حملہ مبینہ قاتلانہ کوشش تھی۔

سیکرٹ سروس ایجنٹس نے گالف کورس پر مشتبہ شخص کو رائفل کے ساتھ دیکھا تھا۔

(جاری ہے)

پولیس کے مطابق مشتبہ شخص رائفل چھوڑ کر فرار ہو گیا تھا، جو پیچھے 2 بیگ، رائفل اور کیمرہ چھوڑ گیا تھا۔مارٹن کاونٹی شیرف کے مطابق مذکورہ مشتبہ شخص کو مارٹن کاونٹی سے گرفتار کر لیا گیا ہے۔دوسری جانب خود پر ہونے والے دوسرے قاتلانہ حملے کے حوالے سے ریپبلیکن صدارتی امیدوار ڈونلڈ ٹرمپ کا کہنا ہے کہ محفوظ اور ٹھیک ہوں، کبھی ہار نہیں مانوں گا۔واضح رہے کہ امریکی صدارتی امیدوار ڈونلڈ ٹرمپ کی گالف کلب سے واپسی کے وقت فائرنگ کا تازہ ترین واقعہ پیش آیا ہے۔