خواجہ سلمان رفیق کی قیادت میں کابینہ کمیٹی برائے امن و امان کا محکمہ داخلہ پنجاب کے مرکزی کنٹرول روم کا دورہ

سیکرٹری داخلہ پنجاب نور الامین مینگل نے صوبہ بھر میں جاری میلاد النبی صلی اللہ علیہ وآلہ وسلم کے جلوسوں بارے بریفنگ دی

بدھ 18 ستمبر 2024 20:02

خواجہ سلمان رفیق کی قیادت میں کابینہ کمیٹی برائے امن و امان کا محکمہ ..

لاہور (اُردو پوائنٹ اخبارتازہ ترین - این این آئی۔ 18 ستمبر2024ء) وزیر صحت پنجاب و چیئرمین کابینہ کمیٹی خواجہ سلمان رفیق کی قیادت میں کابینہ کمیٹی برائے امن و امان نے محکمہ داخلہ پنجاب کے مرکزی کنٹرول روم کا دورہ کیا۔ سیکرٹری داخلہ پنجاب نور الامین مینگل نے صوبہ بھر میں جاری میلاد النبی صلی اللہ علیہ وآلہ وسلم کے جلوسوں بارے بریفنگ دی۔

محکمہ داخلہ کے مرکزی کنٹرول روم میں 2287 جلوسوں اور 568 محافل میلاد کی مانیٹرنگ جاری رہی۔ صوبہ بھر کے تمام مرکزی جلوسوں کو کیمروں کے ذریعے مانیٹر کیا گیا ہے۔ وزیر صحت پنجاب خواجہ سلمان رفیق کی زیر صدارت محکمہ داخلہ میں کابینہ کمیٹی برائے امن و امان کا اجلاس بھی ہوا۔ صوبائی وزراء عاشق حسین کرمانی اور بلال اکبر خان نے بھی شرکت کی۔

(جاری ہے)

اجلاس میں لاہور سمیت پنجاب بھر کے امن و امان اور عید میلاد النبی کے جلوسوں کا تفصیلی جائزہ لیا گیا۔

وزیر صحت و چیرمین کابینہ کمیٹی برائے امن و امان خواجہ سلمان رفیق نے اس موقع پر کہا کہ پنجاب بھر میں عید میلاد النبی صلی اللہ علیہ وآلہ وسلم عقیدت و احترام سے منائی گئی ہے۔ تمام مرکزی جلوسوں کے روٹس اور محافل میلاد کو کیمروں سے مانیٹر کیا گیا ہے۔ آج کا دن پوری امت کیلئے خوشی کا باعث ہے۔ اسے امن و بھائی چارے سے گزارا گیا ہے۔ اجلاس میں ایڈیشنل آئی جی سی ٹی ڈی وسیم سیال، سپیشل سیکرٹری داخلہ فضل الرحمن، ایڈیشنل سیکرٹری عثمان خالد اور متعلقہ حکام نے شرکت کی۔