ایران کے صدرکی 45 سالوں میں اولین سنی گورنرکی نامزدگی

آرش زرہ تان لہونی کو مغربی ریاست کا سربراہ مقرر کیا گیاہے،ایرانی میڈیا

جمعرات 19 ستمبر 2024 13:51

ایران کے صدرکی 45 سالوں میں اولین سنی گورنرکی نامزدگی

تہران(اُردو پوائنٹ اخبارتازہ ترین - این این آئی۔ 19 ستمبر2024ء) ملک کے نئے صدر مسعود پیزشکیان نے سنی مسلم اقلیت کے ایک رکن کو صوبہ کردستان کا گورنر نامزد کیا ہے۔ایرانی میڈیا نے حکومتی ترجمان فاطمہ مہاجرانی کا حوالہ دیتے ہوئے کہا کہ آرش زرہ تان لہونی کو مغربی ریاست کا سربراہ مقرر کیا گیا۔وہ 1979 کے اسلامی انقلاب کے ابتدائی ایام سے لے کر اب تک شیعہ اکثریتی ملک میں علاقائی گورنر بنائے گئے اولین سنی ہیں۔

48 سالہ زرہ تان نے 2020 اور اس سال کے درمیان پاوہ شہر کے لیے پارلیمنٹ کے رکن کے طور پر خدمات انجام دیں۔

(جاری ہے)

ایران کی آبادی کا تقریبا 10 فیصد سنی ہیں جہاں بڑی اکثریت شیعہ ہے اور شیعہ اسلام سرکاری مذہب ہے۔انقلاب کے بعد سے وہ بہت ہی کم اقتدار کے اہم عہدوں پر فائز ہوئے ہیں۔انتہائی قدامت پسند صدر ابراہیم رئیسی کی ہیلی کاپٹر کے حادثے میں ہلاکت کے بعد 69 سالہ پیزشکیان نے جولائی میں قبل از وقت انتخابات کے بعد عہدہ سنبھالا تھا۔اپنی انتخابی مہم کے دوران پیزشکیان نے اہم عہدوں پر نسلی اور مذہبی اقلیتوں خاص طور پر سنی کردوں کی نمائندگی کے فقدان پر تنقید کی تھی۔اگست میں انہوں نے سنی اقلیت کے ایک اور رکن عبدالکریم حسین زادہ کو اپنا نائب صدر بنایا۔