لاہورہائیکورٹ میں سموگ تدراک درخواستوں پر سماعت ، ڈی جی پی ایچ اے کو درخت نہ کاٹنے کا حکم

جمعہ 11 اکتوبر 2024 11:54

لاہور (اُردو پوائنٹ اخبارتازہ ترین - اے پی پی۔ 11 اکتوبر2024ء) لاہور ہائیکورٹ نے ماحولیاتی آلودگی اور سموگ کے تدراک کے لیے دائر درخواستوں پر سماعت کرتے ہوئے لاہور میں درختوں کی کٹائی کا سخت نوٹس لیتے ہوئے ڈی جی پی ایچ اے کو حکم دیا کہ درخت کہیں پر بھی ہو، ایک بھی درخت نہیں کاٹا جا سکتا، یہ اب پی ایچ اے کی ذمہ داری ہے۔دوران سماعت عدالت نے محکمہ ماحولیات کے حکام کو بھی حکم دیا کہ سرگودھا روڈ، فیصل آباد پر دھواں چھوڑنے والی فیکٹریوں کا جائزہ لیں۔

لاہور ہائیکورٹ کے جسٹس شاہد کریم نے سموگ کے تدارک کیس میں ہارون فاروق سمیت دیگر کی ایک ہی نوعیت کی دائر درخواستوں پر جمعہ کو سماعت کی جس میں ماحولیاتی آلودگی اور سموگ کے تدارک کیلئے اقدامات نہ کرنے کی نشاندہی کی گئی۔

(جاری ہے)

دوران سماعت مختلف محکموں کے حکام نے عدالتی حکم پر اپنی اپنی رپورٹس پیش کیں۔ دوران سماعت محکمہ زراعت نے 2024.25کا سموگ ایکشن پلان عدالت میں پیش کیا اور بتایا کہ سموگ پھیلانے والے افراد کے خلاف سخت کارروائی کی جائے گی، محکمہ زراعت کی رپورٹ کے مطابق کسانوں کو 652 سپر سیڈر مہیا کیے ہیں، سپر سیڈر سے فصلوں کی باقیات جلانے کی ضرورت نہیں پڑے گی ۔

عدالت کو بتایا گیا کہ محکمہ ماحولیات نے سموگ کی شکایت کے لیے ہیلپ لائن بنائی ہے جس پر عدالت نے کہا کہ لوگوں کو اس ہیلپ لائن کے حوالے سے آگاہی دی جائے۔سکول ایجوکیشن ڈیپارٹمنٹ نے رپورٹ پیش کی اور عدالت کو بتایا کہ چار سکولوں کو بسوں کی خریداری کے حوالے سے نوٹسز جاری کر دیے ہیں، ڈی سی لاہور نے مذکورہ چار سکولوں کو عدالتی حکم نہ ماننے پر ملاقات کے لیے طلب کر لیا ہے۔ دوران سماعت عدالت نے حکم دیا کہ ایل ڈی اے ٹولنٹن مارکیٹ کے حوالے سے اگلے لائحہ عمل سے متعلق عدالت میں رپورٹ پیش کریں،عدالت نے مختلف محکموں سے کارکردگی رپورٹس طلب کرتے ہوئے سماعت آئندہ جمعہ تک ملتوی کر دی۔