نئے صوبے عوام کی مرضی کے بغیر نہیں بن سکتے‘ گورنر پنجاب

لاہور (اُردو پوائنٹ اخبارتازہ ترین - این این آئی۔ 09 ستمبر2026ء) گورنرپنجاب سردارسلیم حیدرخان نے کہا ہے کہ پٹرولیم مصنوعات کی بڑھتی ہوئی قیمتوں نے عوام کا جینا محال کردیا،غریب کادرد صرف پیپلزپارٹی ہی محسوس کرتی ہے،نئے صوبے عوام کی مرضی کے بغیر نہیں بن سکتے،اتفاق رائے کے بغیر کوئی بھی فیصلہ کرنا ممکن نہیں،ہلال احمر کی طرف سے سیلاب متاثرین میں گھروں کی تقسیم قابل ستائش ہے۔

ان خیالات کا اظہار اُنہوں نے چنیوٹ میں ریڈ کریسنٹ کے زیر اہتمام سیلاب متاثرین میں نئے تعمیر شدہ گھروں کی چابیاں تقسیم کرنے کے حوالے سے منعقدہ تقریب سے خطاب کرتے ہوئے کیا۔گورنرپنجاب سردارسلیم حیدرخان نے تقریب سے خطاب کرتے ہوئے کہا کہ روزانہ کی بنیاد پر پٹرولیم مصنوعات کی بڑھتی ہوئی قیمتوں نے عوام کا جینا دوبھر کر دیا ہے۔

(جاری ہے)

اُنہوں نے کہا کہ اس وقت غریب اور پسہ ہوا طبقہ مہنگائی کی وجہ سے سب سے زیادہ متاثر ہورہا ہے۔

گورنر پنجاب نے کہا کہ دو برس قبل یہ سسٹم نہ چلتا تو ملک ڈیفالٹ ہوجاتا۔نئے صوبوں کی تقسیم کے حوالے سے گورنر پنجاب نے کہا کہ ملک اس وقت زبردستی کا متحمل نہیں ہوسکتا۔اُنہوں نے کہا کہ اتفاق رائے کے بغیر کوئی بھی فیصلہ کرنا ممکن نہیں۔ گورنر پنجاب نے کہا کہ پاکستان پیپلز پارٹی ن لیگ کا صرف ملک چلانے کے لیے ساتھ دے رہی ہے۔گورنر پنجاب سردار سلیم حیدر خان نے مزید کہا کہ چیئرمین ہلال احمر پنجاب میاں محمدحنیف کی سرپرستی میں ہلال احمر انسانیت کی بھلائی کے لئے گراں قدر خدمات سرانجام دی رہی ہے۔

اُنہوں نے کہا یہ بڑی خوش آئند بات ہے کہ آج کی اس تقریب میں سیلاب متاثرین میں 26نئے گھروں کی چابیاں تقسیم کی جارہی ہیں۔ اُنہوں نے کہا کہ ان گھروں کی تعمیر پر تقریباچارکروڑ روپے کی لاگت آئی ہے۔گورنر پنجاب نے کہا کہ پیپلزپارٹی وہ واحد جماعت ہے جس کا منشور روٹی،کپڑا اور مکان ہے۔اُنہوں نے کہا کہ چیئرمین پیپلزپارٹی بلاول بھٹو زرداری نے پورے پاکستان کے سیلاب متاثرین کو نئے گھر تعمیرکرکے دیئے ہیں۔

گورنر پنجاب نے کہا کہ یہ لمحہ فکریہ ہے کہ عوام کا چولہا ٹھنڈا ہے۔اُنہوں نے کہا کہ پیپلزپارٹی لوگوں کو سرکاری نوکریاں دیتی ہے جبکہ باقی پارٹیاں نوکریوں سے نکالتی ہیں۔گورنر پنجاب نے کہا کہ غریب لوگوں کو نوکریوں سے نکالنے کے بجائے بھاری تنخواہیں لینے والوں کو فارغ کیاجائے۔اُنہوں نے کہا کہ غریب کادرد جو پیپلزپارٹی محسوس کرتی ہے وہ اور کوئی سیاسی جماعت محسوس نہیں کرتی۔

گورنر پنجاب نے اس عزم کا اظہار کیا کہ بھٹو کے وارث بلاول بھٹو کو عوامی مینڈیٹ سے اس ملک کا وزیراعظم بنانا ہے۔اس موقع پر چیئرمین ہلال احمر پنجاب میاں محمد حنیف نے کہا کہ ہلال احمر پورے پاکستان میں فلاحی کاموں میں پیش پیش ہے۔اُنہوں نے کہا کہ مجھے فخر ہے کہ سردارسلیم حیدرخان ہلال احمر کے صدرہیں۔اُنہوں نے کہا کہ سردارسلیم حیدرخان ہروقت دُکھی انسانیت کی خدمت میں مصروف رہتے ہیں۔تقریب میں چیئرمین ہلال احمر پنجاب میاں محمدحنیف، جنرل سیکرٹری پیپلزپارٹی وسطی پنجاب حسن مرتضی اور چنیوٹ کے عوام کی کثیرتعداد موجود تھی۔