دوسرا ٹیسٹ : پاکستان نے 5 وکٹوں کے نقصان پر 259 رنز بنا لیے

لاہور (اردو پوائنٹ تازہ ترین اخبار ۔ 15 اکتوبر 2024ء ) دوسرے ٹیسٹ میچ کے پہلے روز دن کے اختتام پر پاکستان نے انگلینڈ کے خلاف 5 وکٹوں کے نقصان پر 259 رنز بنالیے۔ ملتان میں کرکٹ سٹیڈیم میں کھیلے جارہے سیریز کے دوسرے ٹیسٹ میچ میں اننگز کا آغاز کیا تو عبداللہ شفیق ایک مرتبہ پھر ناکامی کی تصویر بنے نظر آئے اور محض 7 کے انفرادی اسکور پر وکٹ گنوا بیٹھے، کپتان شان مسعود 3 رنز کے مہمان ثابت ہوئے۔

گرین شرٹس نے ابتدائی 2 وکٹیں محض 19 رنز پر گنوادیں تھیں۔ بعدازاں صائم اور کامران نے 149 رنز کی پارنٹرشپ قائم کرکے پاکستان کا اسکور مستحکم کیا تاہم صائم 77 رنز بناکر وکٹ گنوا بیٹھے۔ سعود شکیل بیٹنگ کے لیے آئے لیکن صرف 4 رنز بنانے کے بعد آؤٹ ہوگئے۔ کامران غلام نے اپنے ڈیبیو میچ میں 198 گیندوں پر ایک چھکے اور 9 چوکوں کی مدد سے سنچری بنائی، انہوں نے جو روٹ کو باؤنڈری لگا کر اپنی پہلی سنچری مکمل کی۔

(جاری ہے)

انگلینڈ کی جانب سے جیک لیچ نے 2، برائیڈن کارس،شعیب بشیر اور میٹ پوٹس نے ایک ایک وکٹ حاصل کی۔ اس سے قبل ملتان میں کھیلے جارہے تین میچوں کی سیریز کے دوسرے میچ میں ٹاس جیت کر قومی ٹیم کے کپتان شان مسعود کا کہنا تھا کہ ہم پہلے بیٹنگ کریں گے، ہم پہلی اننگز میں اچھا سکور بنانا چاہتے ہیں۔ قومی کرکٹ ٹیم نے انگلینڈ کے خلاف دوسرے ٹیسٹ کے لیے اپنی پلیئنگ الیون کا اعلان کردیا تھا جس میں 3 اسپیشلسٹ سپنرز کو شامل کیا گیا ہے اور عامر جمال بطور آل راؤنڈر 11 رکنی ٹیم کا حصہ ہیں۔

ادھر، انگلینڈ کی پلیئنگ الیون میں کپتان بین اسٹوکس اور میٹ پوٹس کی واپسی ہوئی ہے، فاسٹ باولرز گس ایٹکنسن اور کرس ووکس کو دوسرے ٹیسٹ سے آرام دے دیا گیا۔ پاکستانی ٹیم شان مسعود (کپتان)، سعود شکیل (نائب کپتان)، صائم ایوب، عبداللہ شفیق، کامران غلام، محمد رضوان، سلمان علی آغا، عامر جمال، نعمان علی، ساجد خان، زاہد محمود پر مشتمل ہے۔

انگلینڈ کی ٹیم زیک کراؤلی، بین ڈکٹ، اولی پوپ، جوئے روٹ، ہیری بروک، بین اسٹوکس (کپتان)، جیمی اسمتھ، برائیڈن کرس، میٹ پوٹس، جیک لیچ اور شعیب بشیر پر مشتمل ہے۔ واضح رہے کہ انگلینڈ نے پاکستان کو ملتان میں کھیلے گئے پہلے ٹیسٹ میچ میں اننگز اور 47 رنز سے شکست دے دی تھی۔ پہلے میچ کی بدترین شکست کے بعد قومی ٹیم کی نومنتخب سلیکشن کمیٹی نے ٹیم میں اکھاڑ پچھاڑ کرتے ہوئے بابر اعظم، شاہین شاہ آفریدی، نسیم شاہ، ابرار احمد، سرفراز احمد کو ڈراپ کرتے ہوئے 6 نئے کھلاڑیوں کو شامل کیا۔