ؔلیسکو میں نیٹ میٹرنگ کے لئے پرائیویٹ سٹیٹک بائی ڈائریکشنل میٹر خریدنے کی تاریخ بڑھا کر 15نومبر کر دی گئی

بدھ 6 نومبر 2024 21:30

?لاہور (اُردو پوائنٹ اخبارتازہ ترین - آن لائن۔ 06 نومبر2024ء) لاہور الیکٹرک سپلائی کمپنی لیسکو کے چیف ایگزیکٹو انجینئر شاہد حیدر کی ہدایت پر کسٹمر سروسز ڈائریکٹر سرور مغل نے نیٹ میٹرنگ کے لئے پرائیویٹ سٹیٹک بائی ڈائریکشنل میٹر خریدنے کی تاریخ بڑھا کر 15نومبر کر دی ہے۔ لیسکو میں نیٹ میٹرنگ کے لئے سٹیٹک بائی ڈائریکشنل میٹر خریدنے کے لئے این او سی دیا جا رہا تھا جس کی آخری تاریخ31اکتوبر تھی اور اس کے بعد نیٹ میٹرنگ کے لئے اے ایم آئی بائی ڈائریکشنل میٹر لگائے جانے تھے۔

اے ایم آئی میٹرز میں معمولی تاخیر کی وجہ سے گرین میٹرز کی تاریخ بڑھا کر15نومبر کر دی گئی تاکہ لیسکو صارفین کو کسی قسم کی پریشانی کا سامنا نہ کرنا پڑے۔ چیف ایگزیکٹو انجینئر شاہد حیدر کا کہنا تھا کہ لیسکو صارفین ہماری اولین ترجیح ہیں۔

(جاری ہے)

لیسکو اپنے صارفین کو بہترین سہولیات فراہم کرنے کے لئے ہمیشہ کوشاں ہے۔ چیف ایگزیکٹو انجینئر شاہد حیدر کی زیر صدارت فنکشنل ہیڈز کا اجلاس، صارفین کو بجلی کی بلاتعطل فراہمی اور شکایات کے ازالے کیلئے کیے جانیوالے اقدامات پر غور کیا گیا۔

لاہور الیکٹرک سپلائی کمپنی کے شعبہ تعلقات عامہ کی جانب سے جاری ہونیوالے اعلامیے کے مطابق چیف ایگزیکٹو لیسکو کی زیر صدارت ہونیوالے اعلیٰ سطح کے اجلاس میں بجلی کی بلا تعطل فراہمی اور شکایات کے ازالے کے لیے کیے جانیوالے اقدامات کا جائزہ لیا گیا۔ اس موقع پر چیف ایگزیکٹو آفیسر انجینئر شاہد حیدر کی جانب سے ہدایت کی گئی کہ متعلقہ افسران صارفین کی شکایات کے فوری ازالے کے لیے اقدامات کریں اور اس حوالے سے کوئی شکایت موصول ہونے کی صورت میں بروقت کارروائی کریں۔

چیف ایگزیکٹو کا کہنا ہے کہ لیسکو کے کسٹمرسروسز سنٹرز میں زیادہ سے زیادہ سہولیات فراہم کی جائیں اور کسٹمر سروسز سنٹرز آنیوالے صارفین کی شکایات کو ترجیحی بنیادوں پر حل کیا جائے۔ اجلاس میں انجینئر شاہد حیدر کے علاوہ ڈائریکٹر ایچ آر ضمیر حسین کولاچی، چیف فنانس آفیسر بشریٰ عمران، ڈائریکٹر کسٹمر سروسزسرور مغل،کمپنی سیکرٹری گوہر ایوب،چیف انجینئر آپریشنزعباس علی، چیف انجینئر پی اینڈ ڈی عمران محمود، چیف انجینئرپی آئی یو اعجاز بھٹی، منیجر کمرشل طاہر ندیم،چیف انجینئر پی ایم یو شعیب عاصم، چیف انجینئر ٹی اینڈ جی ظفر اقبال، ڈائریکٹر کمپلینٹ سیل رانا رضوان صبغت اللہ اور ڈائریکٹر سیفٹی فواد خالد موجود تھے۔