تمباکو کی جدید نیکوٹین مصنوعات پر فوری کارروائی عوامی صحت کے لیے ضروری ہے، سپارک

منگل 26 نومبر 2024 18:53

اسلام آباد (اُردو پوائنٹ اخبارتازہ ترین - اے پی پی۔ 26 نومبر2024ء) بچوں کے حقوق و تحفظ کیلئے کام کرنے والی غیر سرکاری تنظیم سپارک نے ملک میں بچوں و نوجوانوں میں تیزی سے مقبول ہوتی ہوئی نیکوٹین مصنوعات پر فوری کارروائی کا مطالبہ کرتے ہوئے کہا ہے کہ نوجوانوں اور بچوں کو یہ تاثر دیا جاتا ہے کہ یہ مصنوعات روایتی سگریٹ کے مقابلے میں کم نقصان دہ ہیں لیکن در حقیقت یہ صحت کے سنگین مسائل کا باعث بنتی ہیں ۔

منگل کو جاری ایک بیان میں سپارک کے پروگرام مینیجر ڈاکٹر خلیل احمد نے کہا کہ تمباکو انڈسٹری نوجوانوں اور بچوں کو اپنی مصنوعات کی طرف راغب کرنے کے لیے مختلف حکمت عملیاں اپنا رہی ہیں جس میں پرکشش پیکجنگ اور جدید ذائقے شامل ہیں جس سے اس تاثر کو فروغ ملتا ہے کہ شاید یہ مصنوعات روایتی سگریٹس کے مقابلے میں کم نقصان دہ ہیں۔

(جاری ہے)

یہ بیانیہ عوامی صحت کی کوششوں کو نقصان پہنچاتا ہے اور بچوں کو نشہ آور مواد کی طرف راغب کرتا ہے۔

انھوں نے کہا کہ پاکستان میں فی الحال ان مصنوعات کی تشہیر، فروخت اور اشتہارات کے حوالے سے کوئی قانونی فریم ورک موجود نہیں ہے۔ حکومت کو فوری طور پر ان مصنوعات پر پابندی عائد کرنے کے لیے اقدامات کرنا ہوں گے تاکہ صحت عامہ کے تحفظ کو مضبوط بنایا جا سکے۔ ڈاکٹر خلیل احمد نے اس بحران کے وسیع تر اثرات پر روشنی ڈالتے ہوئے مزید کہا کہ تمباکو کمپنیاں ہماری نوجوان نسل کی فلاح و بہبود کو خطرے میں ڈال رہی ہیں ۔

نیکوٹین کی لت کے طویل المدتی نتائج سنگین ہیں جو نہ صرف فرد کی صحت کو متاثر کرتے ہیں بلکہ ملک کی سماجی اور اقتصادی ترقی پر بھی گہرے اثرات مرتب کرتے ہیں۔ سپارک تمام اقسام کی تمباکو اور نیکوٹین مصنوعات پر فوری کارروائی کا مطالبہ کر تا ہے ۔ انھوں نے کہا کہ ہم حکومت سے درخواست کرتے ہیں کہ ان مصنوعات کی فروخت اور پیداوار کو محدود کرنے کے لیے سخت پالیسیاں متعارف کرائے تاکہ ہمارے بچوں اور معاشرے کے لیے ایک صحت مند مستقبل کو یقینی بنایا جا سکے۔