سعودی مریض نوجوان کی سنیپ چیٹ سٹوری دیکھ کر نامعلوم خاتون نے گردہ عطیہ کردیا

بدھ 1 جنوری 2025 16:53

ریاض(اُردو پوائنٹ اخبارتازہ ترین - این این آئی۔ 01 جنوری2025ء)گردوں کے عارضے میں مبتلا سعودی نوجوان عبدالعزیز العمری کی سنیپ چیٹ پر شیئر کی گئی سٹوری دیکھ کر نامعلوم خاتون نے گردہ عطیہ کر دیا ۔عرب ٹی وی کے مطابق عبدالعزیز العمری ایک سال سے گردے کے مرض میں مبتلا تھا، اپنی اس تکلیف کا اظہار سوشل میڈیا پلیٹ فارم سنیپ چیٹ پر کیا ۔عبدالعزیزالعمری کا کہنا تھا کہ سنیپ چیٹ سبب بنا اور اس کے مرض کا مداوا ہو گیا، وہ یہ سوچ بھی نہیں سکتا تھا کہ اسے اتنی جلدگردے کا عطیہ مل جائے گا۔

(جاری ہے)

اس نے بتایا کہ سٹوری پوسٹ کرنے کے کچھ دن بعد جدہ کے کنگ فیصل سپیشلسٹ ہسپتال سے اس کے نمبر پر کال موصول ہوئی جہاں سے یہ اطلاع دی گئی کہ ایک خاتون جو اپنا نام اور ایڈریس ظاہر نہیں کرنا چاہتی اپنا گردہ محض ثواب کی نیت سے عطیہ کرنے کی خواہاں ہیں۔ہسپتال سے اطلاع ملنے کے بعد متعلقہ شعبے سے رجو ع کیا جہاں تمام ٹیسٹ ہوئے جن کی رپورٹ مثبت آنے کے بعد گردے کی کامیاب پیوند کاری کی گئی۔انسانی ہمدردی اور ایثار کی یہ کہانی سنیپ چیٹ سے شروع ہوئی اور ہسپتال میں ایک انجانے شخص کو نئی زندگی دے کر ختم ہوئی۔