شعبہ پلانٹ پروٹیکشن نے گندم پر سپرے کیلئے ضروری سفارشات جاری کردیں

فیصل آباد (اُردو پوائنٹ اخبارتازہ ترین - اے پی پی۔ 10 جنوری2025ء) شعبہ پلانٹ پروٹیکشن محکمہ زراعت نے گندم پر سپرے کیلئے ضروری سفارشات جاری کی ہیں اور کہا ہے کہ کاشتکارگندم کی فصل سے چوڑے پتوں والی جڑی بوٹیوں کی تلفی کیلئے بجائی کے 30سے 35 دن بعد جبکہ باریک یا نوکیلے پتوں والی جڑی بوٹیوں کی تلفی کیلئے بجائی کے 45سے 50دن بعد زمین کی تروتر حالت میں مخصوص سفارش کردہ زہروں کا سپرے کریں کیونکہ جڑی بوٹیوں کے 3سے 5پتوں کے مرحلہ پر زہر سے انسداد آسان ہوتا ہے نیزسپرے کیلئے پانی 120لیٹر فی ایکڑ اور خشک وتر میں 150لیٹر فی ایکڑ تک استعمال کرنے سمیت سپرے کے کم از کم 10،15 دن تک کھیت کو پانی نہ لگایا جائے اورنہ ہی اس میں گوڈی کی جائے۔

شعبہ پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آباد کے ترجمان اسرارارشد نے بتایا کہ چوڑے اور نوکیلے پتوں والی جڑی بوٹیاں گندم کی فصل کیلئے انتہائی نقصان دہ ثابت ہو رہی ہیں جبکہ70 سے 80 فیصد کھیتوں میں جڑی بوٹیوں سے نقصان کی معاشی حد میں اضافہ بھی ہوجاتا ہے لہٰذا کاشتکاروں کو فوری کیمیائی زہروں کے استعمال کی ہدایت کی گئی ہے تاکہ جڑی بوٹیوں کی بروقت تلفی یقینی بنائی جاسکے۔

(جاری ہے)

انہوں نے بتایاکہ گندم کی چوڑے پتوں والی جڑی بوٹیوں میں باتھو، پوہلی، پیازی، جنگلی پالک، جنگلی مٹر، ھالوں، ریواڑی، سینجی، کرنڈ، شاہترہ، کاشنی، مینا، لیہلی، بلی بوٹی، پیازی، لیہہ اونٹ چرا اور درانک وغیرہ جبکہ باریک یا نوکیلے پتوں والی جڑی بوٹیوں میں دمبی سٹی، جنگلی جئی، جنگلی سوانک اور گھاس وغیرہ شامل ہیں۔انہوں نے بتایاکہ ان جڑی بوٹیوں کے تدارک کیلئے سپرے کرتے وقت چند ایک احتیاطوں کو مد نظر رکھناضروری ہے مثلاًسپرے دھوپ میں اس وقت کی جائے جب اوس جزوی طور پر ختم ہو جائے تاہم ابر آلود موسم اور دھند میں زہرپاشی کا عمل مؤخر کر دیا جائے نیز چوڑے اور نوکیلے پتوں والی جڑی بوٹیوں کیلئے الگ الگ مخصوص زہروں کا سپرے کیا جائے اور کوشش کی جائے کہ کہیں اوور لیپنگ نہ ہو یعنی کوئی جگہ خالی نہ رہے اور نہ ہی کہیں دوہرا سپرے ہو۔

انہوں نے کہاکہ سپرے کیلئے مخصوص ٹی جیٹ نوزل یا فلیٹ فین پیتل کی نوزل استعمال کی جائے۔