ہاؤس بزنس ایڈوائزری کمیٹی کا قومی اسمبلی کااجلاس 24جنوری تک جاری رکھنے کا فیصلہ

پیر 13 جنوری 2025 23:02

اسلام آباد (اُردو پوائنٹ اخبارتازہ ترین - این این آئی۔ 13 جنوری2025ء)ہاؤس بزنس ایڈوائزری کمیٹی کے اجلاس میں قومی اسمبلی کااجلاس 24جنوری تک جاری رکھنے کا فیصلہ ہوا ہے۔ پیر کو قومی اسمبلی کی ہاؤس بزنس ایڈوائزری کمیٹی کا اجلاس قائم مقام اسپیکر سید میر غلام مصطفی شاہ کی صدارت میں منعقد ہوا۔اجلاس میں قومی اسمبلی کے 12 ویں اجلاس کے ایجنڈے اور دورانیے پر تبادلہ خیال کیا گیا۔

کمیٹی اجلاس میں قومی اسمبلی کے موجودہ اجلاس کو 24 جنوری تک جاری رکھنے کا فیصلہ کیا گیا ۔

(جاری ہے)

قومی اسمبلی کا منگل، بدھ اور جمعرات کو ہونے والے اجلاس دن دو بجے شروع ہونگے۔قومی اسمبلی کے 12 اجلاس میں وقفہ سوالات اور عوامی فلاح و بہبود سے متعلق قانون سازی کو زیر بحث لایا جائے گا۔کمیٹی اجلاس میں وفاقی وزیر قانون و انصاف و پارلیمانی امور سینیٹر اعظم نذیر تارڑ، ممبران قومی اسمبلی طارق فضل چوہدری، شیخ آفتاب احمد، نزہت صادق، سید نوید قمر، شہلا رضا، سید حفیظ الدین اور خالد حسین مگسی نے شرکت کی۔ اجلاس میں زرتاج گل، ملک عامر ڈوگر، نور عالم خان، گل اصغر خان بھی شریک تھے۔