محکمہ زراعت کی کاشتکاروں کو کورے ودھندسے متاثرمٹر کی فصل پر3سے4کلویوریا100 لیٹر پانی میں ملا کر سپرے کرنے کی ہدایت

منگل 14 جنوری 2025 14:29

فیصل آباد (اُردو پوائنٹ اخبارتازہ ترین - اے پی پی۔ 14 جنوری2025ء) نظامت زرعی اطلاعات محکمہ زراعت نے کاشتکاروں کو ہدایت کی ہے کہ مٹر کی بہتر پیداوار کیلئے فصل کو موسمی اثرات سے بچانا ضروری ہے لہٰذا وہ ماہرین کے مشوروں پر عملدرآمد کریں تاکہ بعد ازاں انہیں کسی مشکل یا پریشانی کا سامنا نہ کرنا پڑے۔ کاشتکاروں کے نام پیغام میں محکمہ کے ترجمان نے کہا کہ کورے اور دھند سے متاثرہ مٹر کی فصل پر 3سے4 کلو گرام یوریا 100 لیٹر پانی میں ملا کر اس کا سپرے کرنا چاہیے۔

(جاری ہے)

انہوں نے کہا کہ سرد موسم میں آبپاشی کا وقفہ بھی بڑھا کر15روز کرنے کے مفید نتائج حاصل ہو سکتے ہیں۔انہوں نے کہا کہ خالص بیج کے حصول کیلئے پھول آنے اور پھلیاں بننے پر چھدرائی کی جائے اور جو پودے مطلوبہ قسم کے معیار پر پورے نہ اتریں انہیں نکال دیا جائے۔ انہوں نے کہا کہ کاشتکا ر مٹر کی فصل میں پھول آنے پر فی ایکڑ نصف بوری یوریا کھاد ڈ الیں نیز درجہ حرارت کم ہو نے پر مٹر کی اگیتی فصل پر چونکہ اکھیڑا کی بیماری کے حملہ آور ہونے اور پودے کے جڑ سے سوکھنے کا خدشہ ہوتا ہے لہٰذا اس بیماری سے بچاؤکیلئے بھی محکمہ زراعت توسیع و پیسٹ و ارننگ کے عملہ کی مشاورت سے سپرے یقینی بنایا جائے۔