فیصل آباد،کاشتکاروں کو دنبی سٹی اور جنگلی جئی کے خاتمہ کےلئے محکمہ زراعت کے فیلڈ سٹاف کی مشاورت سے سپرے کی ہدایت

جمعہ 24 جنوری 2025 13:42

فیصل آباد (اُردو پوائنٹ اخبارتازہ ترین - اے پی پی۔ 24 جنوری2025ء) محکمہ زراعت کے شعبہ پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز فیصل آباد نے کاشتکاروں کو جڑی بوٹیوں کے خاتمہ کےلئے فوری اقدامات کی ہدایت کی ہے۔اسسٹنٹ ڈائریکٹرپلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز فیصل آباد اسرارارشدنے کہا کہ جڑی بوٹیوں کی تلفی اس لئے بھی ضروری ہے کہ اگر جڑی بوٹیوں کا بیج ایک سال پک جائے تو یہ کئی سال تک متواتر اگتا اور فصل کو نقصان پہنچاتا رہتا ہے لہٰذا دنبی سٹی اور جنگلی جئی کےلئے محکمہ زراعت کے فیلڈ سٹاف کی مشاورت سے سپرے کیا جائے۔

انہوں نے کہا کہ اس ضمن میں محکمہ زراعت کی ہیلپ لائن سے بھی استفادہ کیا جا سکتا ہے۔انہوں نے کاشتکاروں کو ہدایت کی کہ وہ گندم کی بمپر کراپ کے حصول اور فصل کو ہر قسم کی بیماریوں سے بچانے کےلئے گندم کی فصل پر دوپہر کے وقت ٹی جیٹ نوزل کے ذریعے سپرے یقینی بنائیں اور فصل میں موجود جڑی بوٹیوں کو تلف کرنے کےلئے فوری اقدامات کریں کیونکہ جڑی بوٹیاں گندم کی پیداوار کو 42فیصد تک نقصان پہنچانے کی صلاحیت رکھتی ہیں۔

(جاری ہے)

انہوں نے کہا کہ گندم کی فصل کو تین مراحل میں پانی دینا ضروری ہے۔انہوں نے بتا یا کہ پہلا پانی جھاڑ کی حالت میں، دوسرا پانی گوبھ کی حالت میں اور تیسرا پانی دودھیا حالت میں دیا جائے۔