پرنس کریم آغا خان کی زندگی اسماعیلی کمیونٹی اورپاکستان کے عوام کے لیے ایک مشعل راہ تھی، شاہد خاقان عباسی

اسلام آباد(اُردو پوائنٹ اخبارتازہ ترین - آن لائن۔ 05 فروری2025ء)عوام پاکستان کے کنوینئر شاہد خاقان عباسی نے اسماعیلی برادری کے روحانی پیشوا، پرنس کریم آغا خان کی وفات پر گہرے دکھ اور افسوس کا اظہار کیا ہے۔ پرنس کریم آغا خان، جو 88 سال کی عمر میں لزبن میں انتقال کر گئے، اسماعیلی کمیونٹی کے 49 ویں امام تھے اور انہوں نے اپنی پوری زندگی انسانیت کی خدمت کے لیے وقف کر رکھی تھی۔

پرنس کریم آغا خان نے دنیا بھر مں غربت کے خاتمے، صحت کی بہتری، اور تعلیم کے فروغ کے لیے بے مثال خدمات انجام دیں۔ "پرنس کریم آغا خان کی زندگی اسماعیلی کمیو نٹی اور پاکستان کے عوام کے لیے ایک مشعل راہ تھی۔" ان کی خدمات نے نہ صرف اسماعیلی فرقے بلکہ پورے ملک میں بہت سے لوگوں کی زندگیوں میں بہتری لانے مں اہم کردار ادا کیا۔

(جاری ہے)

ان کی قیادت میں آغا خان ڈیولپمنٹ نیٹ ورک (AKDN) نے ترقی پذیر ممالک میں لاکھوں لوگوں کی زندگیوں کو بہتر بنایا۔

ان کی بصیرت اور انسانیت کے لیے محبت نے دنیا بھر میں مختلف قوموں اور برادریوں کو متاثر کیا۔ پرنس کریم آغا خان نے ہمیشہ پاکستان کے عوام کے ساتھ اپنی محبت کا اظہار کیا اور ملک کی ترقی کے لیے مختلف فلاحی منصوبوں میں حصہ لیا۔ ان کی قیادت میں اسماعیلی کمیونٹی نے صحت، تعلیم، اور غربت کے خاتمے کے لیے کئی اہم اقدامات کیے، جو ان کی پاکستان کے ساتھ وابستگی کا ثبوت ہیں انہوں نے کہا کہ جب وہ وزیر اعظم تھے تو انہوں نے اپنے دور حکومت میں پرنس کریم آغا خان سے ملاقات کی ، جس میں انہوں نے ملک کے مسائل اور اسماعیلی کمیونٹی کے کردار پر تبادلہ خیال کیا۔

یہ ملاقات اس بات کا عکاس ہے کہ پرنس کریم آغا خان نے ہمشیہ پاکستان کی ترقی اور استحکام کے لیے اپنی خدمات پیش کیں انکا کہنا تھا کہ آج ہم ایک عظیم رہنما کو کھو چکے ہیں انکا انتقال ایک عظیم نقصان ہے، جنہوں نے اپنی زندگی کو انسانیت کی فلاح و بہبود کے لیے وقف کیا۔ ان کی خدمات ہمشہ یاد رکھی جائیں گی اور ان کا ورثہ آنے والی نسلوں کے لیے مشعل راہ رہے گا۔انہوں نے کہا کہ وہ اس موقع پر اسماعیلی برادری کے ساتھ اپنی گہری ہمدردی کا اظہار کرتے ہیں اور دعا گو ہیں کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور ان کے خاندان و پیروکاروں کو صبر جمیل عطا کرے۔