لیبیا کشتی حادثے میں 7 پاکستانیوں کے جاں بحق ہونے کی تصدیق ہوگئی

گزشتہ روز پیش آنے والے حادثے میں جاں بحق پاکستانیوں کی شناخت ان کے پاسپورٹس سے کی گئی

ساجد علی منگل 11 فروری 2025 13:09

لیبیا کشتی حادثے میں 7 پاکستانیوں کے جاں بحق ہونے کی تصدیق ہوگئی

اسلام آباد ( اُردو پوائنٹ اخبارتازہ ترین۔ 11 فروری 2025ء ) لیبیا میں ہونے والے کشتی حادثے میں 7 پاکستانیوں کے جاں بحق ہونے کی تصدیق کردی گئی۔ تفصیلات کے مطابق گزشتہ روز افریقی ملک لیبیا میں غیرقانونی تارکین کو لے جانے والی کشتی الٹ گئی، کشتی الٹنے کا یہ حادثہ زاویہ شہر کے شمال مغرب میں واقع مرساڈیلا کی بندرگاہ کے قریب پیش آیا، ایف آئی اے نے لیبیا میں پیش آئے اس حادثے میں کشتی میں سوار پاکستانیوں میں سے 7 کے جاں بحق ہونے کی تصدیق کی ہے، جاں بحق ہونے والوں میں 6 افراد کا تعلق ضلع کرم اور ایک کا باجوڑ سے ہے، جاں بحق پاکستانیوں کی شناخت ان کے پاسپورٹس سے کی گئی۔

اس حوالے سے ترجمان دفتر خارنہ کا کہنا تھا کہ حادثے کے بعد پاکستانی شہریوں کے بارے میں جاننے کے لیے طرابلس میں پاکستانی سفارتخانے کی ٹیم کو زاویہ ہسپتال روانہ کردیا گیا جہاں حادثے کے شکار مسافروں کو پہنچایا گیا ہے پاکستانی سفارتخانہ کی ٹیم وہاں مقامی حکام کی معاونت کرے گی تاکہ جاں بحق ہونے والوں کی شناخت میں مدد مل سکے، اس کے علاوہ وزارت خارجہ میں کرائسز مینجمنٹ یونٹ کو بھی متحرک کردیا گیا تاکہ صورتحال کی نگرانی کی جائے۔

(جاری ہے)

بتایا جارہا ہے کہ لیبیا کے جنوب مشرقی صحرا میں دو اجتماعی قبروں سے تقریباً 50 لاشیں بھی برآمد ہوئی ہیں، یہ لاشیں یورپ پہنچنے کے خواہش مند تارکین وطن افراد کی ہیں، پہلی اجتماعی قبر ملک کے جنوب مشرقی شہر کفرہ کے ایک فارم سے دریافت ہوئی جس میں سے 19 لاشیں نکالی گئیں، ان لاشوں کو پوسٹ مارٹم کے لیے بھیج دیا گیا، جن افراد کی لاشیں ملی ہیں ان میں سے بعض افراد کو فائرنگ کر کے ہلاک کیا گیا اور پھر اجتماعی قبر میں دفن کردیا گیا جب کہ دوسری اجتماعی قبر بھی کفرہ میں ایک انسانی سمگلنگ کے اڈے پر چھاپے کے دوران دریافت ہوئی جس میں کم از کم 30 لاشیں موجود تھیں جہاں مجموعی طور پر 70 افراد کو اس قبر میں دفن کیے جانے کا انکشاف ہوا جس کے بعد حکام نے مزید لاشوں کی تلاش شروع کردی۔