باغبانوں کو پت جھڑ پودوں کی شاخ تراشی بہار کے آغاز سے پہلے مکمل کرنے کی ہدایت

ہفتہ 15 فروری 2025 17:10

فیصل آباد (اُردو پوائنٹ اخبارتازہ ترین - اے پی پی۔ 15 فروری2025ء) باغبانوں کوسدا بہار پودوں کی باقاعدہ شاخ تراشی پھل کی برداشت کے فوراً بعدجبکہ پت جھڑ پودوں کی شاخ تراشی موسم بہار کے آغاز سے پہلے کرنے کی ہدایت کی گئی ہے اورکہاگیاہے کہ باغبان پھلدار پودوں کو تندرست و توانا رکھنے، پھل کی کوالٹی کو بہتر کرنے اور پیداواری صلاحیت بڑھانے کیلئے شاخ تراشی یقینی بنائیں نیزشاخ تراشی تیز دھارقینچی یا آری سے کی جائے تاکہ پودے کو زیادہ نقصان سے بچایا جاسکے۔

ڈپٹی ڈائریکٹرمحکمہ زراعت توسیع فیصل آبادعدیل احمدنے باغبانوں و کاشتکاروں سے کہاکہ مناسب شاخ تراشی پودوں کو تندرست و توانا رکھنے اور بہتر پیداوار کے حصول کیلئے اہم ہے کیونکہ اس سے پودے کی مطلوبہ جسامت،اونچائی اور پھیلاؤ برقرار رہتا ہے۔

(جاری ہے)

انہوں نے بتایاکہ شاخ تراشی سے پھل کی کوالٹی،حجم، رنگت، ذائقہ وغیرہ بہتر اور پرانے پودوں میں دوبارہ پیداواری صلاحیت پیدا کرنے میں بھی مدد ملتی ہے۔

انہوں نے بتایا کہ شاخ تراشی سے پودوں میں چاروں طرف ایک جیسی بڑھوتری ہوتی ہے اس طرح تیز آندھی کی صورت میں بھی پودا ٹوٹتا یا گرتا نہیں۔ انہوں نے بتایاکہ شاخ تراشی کے ذریعے پودے کی مناسب اونچائی رکھنے اور پھل توڑنے میں آسانی ہوتی ہے اور پودے کا مناسب پھیلاؤ رکھ کر ایک ایکڑ میں زیادہ پودے لگا کر زیادہ پیداوار لی جاسکتی ہے۔