قرأت ونعت سوسائٹی ڈائریکٹوریٹ آف سٹوڈنٹس افیئرز اسلامیہ یونیورسٹی آف بہاول پور کے زیر اہتمام سیمینار

ہفتہ 15 فروری 2025 18:40

اے پی پی (اُردو پوائنٹ اخبارتازہ ترین - اے پی پی۔ 15 فروری2025ء) قرأت ونعت سوسائٹی ڈائریکٹوریٹ آف سٹوڈنٹس افیئرز اسلامیہ یونیورسٹی آف بہاول پور کے زیر اہتمام سیمینار بعنوان علامہ اقبال رحمۃ اللہ علیہ کا عشق رسولﷺ منعقد کیا گیا۔مہمان مقررہ پروفیسر ڈاکٹر روزینہ انجم نے خطاب کرتے ہوئے کہا کہ بیسویں صدی کا ایک روشن وتابناک ستارہ جس نے اپنی روشن فکر سے عالم کائنات کو نہ صرف منور کیا بلکہ ذہن انسانی پر ان مٹ نقوش چھوڑے ہیں وہ مایہ ناز ہستی علامہ محمد اقبالؒ کی ہے جن کو شاعر مشرق، حکیم الأمت کی حیثیت سے جانا جاتا ہے۔

ان کی پہچان عاشق رسولﷺ کی ہے۔ پروفیسر ڈاکٹر ضیاء الرحمن نے عشق رسولﷺ کے تقاضے بیان کرتے ہوئے کہا کہ محبتِ رسول ﷺ کا بلند معیار یہ ہے کہ عبادات کے سوا محبوب مصطفی ﷺ کی عادات، نفسیات اور طبائع بھی نظروں میں قابلِ اتباع بن جائیں۔

(جاری ہے)

محبتِ نبی ﷺ ایمان کی روح ہے اور اس کے بغیر جملہ اعمال اور مقامات و احوال بے جان ڈھانچہ ہیں۔ ڈاکٹر آصف ندیم ایڈوائزر مجلس مباحث نے کہا کہ سید المرسلین خاتم النبیین رحمۃ للعالمین سیدنا محمد مصطفیﷺ کی دائمی و عالمی نبوت و رسالت پر ایمان لانا فرض ہے۔

جس کے بغیر کوئی آدمی شرعاً مومن نہیں کہلا سکتا اور نہ دائرہ اسلام میں داخل ہوسکتا ہے۔ڈاکٹر شبانہ نذر ایڈوائزر آئی یو بی قرآت ونعت سوسائٹی نے تقریب میں آنے والے مہمان اساتذہ کرام اور طلباء و طالبات کا تہہ دل سے شکریہ ادا کیا۔ اس موقع پر پروفیسر ڈاکٹر ثمر فہد، ڈاکٹر سجیلہ کوثر، ڈاکٹر اکرم الازہری، ڈاکٹر قاضی حسین احمد، ڈاکٹر رمضان اشرف اور دیگر اساتذہ کرام نے شرکت کی۔