پھولوں کے کاشتکاروں کو اچھی پیداوارکیلئے ایک شاخ پر5 سے7 آنکھیں چھوڑ کر فوری شاخ تراشی کی ہدایت

پیر 24 فروری 2025 16:20

فیصل آباد (اُردو پوائنٹ اخبارتازہ ترین - اے پی پی۔ 24 فروری2025ء) پھولوں کے کاشتکاروں کو اچھی پیداوارکیلئے ایک شاخ پر5 سے7 آنکھیں چھوڑ کر فوری شاخ تراشی کی ہدایت کی گئی ہے اورموسم کی تبدیلی کے باعث ہفتہ میں 2مرتبہ آبپاشی کو بھی ضروری قرار دیدیا گیاہے۔جامعہ زرعیہ فیصل آبادکے ماہرین گلبانی و چمن آرائی نے بتایاکہ کاشتکاروں کو چاہیے کہ وہ ہرسال موسم بہار کے آغاز پر پھولوں کے پودوں کی شاخ تراشی یقینی بنائیں۔

(جاری ہے)

انہوں نے کہاکہ شاخ کو کونپل کے چوتھائی انچ اوپر سے کاٹاجائے اور یہ کٹائی کونپل کی مخالف سمت سے ہونی چاہیے۔ انہوں نے کہاکہ موسم بہارمیں گلاب سمیت دیگر پھولوں کے پودوں کی شاخ تراشی بہترین اثرات ظاہر کرتی ہے تاہم اگر شاخ تراشی موسم خزاں یا موسم سرما کے آغاز میں کی جائے تو نئی پھوٹ جلد بنے گی مگر وہ کورے سے متاثر ہوسکتی ہے۔ انہوں نے کہاکہ کاشتکار پیوند کے مقام سے نیچے تنے پر یا زمین سے نکلنے والی شاخوں کی بھی مناسب تراش خراش کرتے رہیں کیونکہ یہ شاخیں روٹ سٹاک سے نکلتی ہیں جو کار آمد نہیں ہوتیں۔ انہوں نے گلاب کے پودوں پر مائلڈ یو، بلیک سپاٹ، رسٹ، ڈائی بیک جیسی بیماریوں کے حملہ کے تدارک کیلئے بھی بروقت اقدامات کرنے کی ہدایت کی ہے۔