سمبڑیال میں محکمہ زراعت کی زیر نگرانی گندم کی فصل کے حوالے سے میگا سمارٹ کسان اجتماع کا انعقاد

منگل 25 فروری 2025 19:00

سمبڑیال (اُردو پوائنٹ اخبارتازہ ترین - اے پی پی۔ 25 فروری2025ء) سمبڑیال میں محکمہ زراعت کی زیر نگرانی گندم کی فصل کے حوالے سے میگا سمارٹ کسان اجتماع کا انعقاد کیا گیا۔فیلڈ انویسٹی گیٹرلیاقت علی کے مطابق منگل کو اتفاق میرج ہال بھوپالوالا تحصیل سمبڑیال میں گندم کی فصل 2024.25 کے حوالے سے ایک بڑے سمارٹ کسان اجتماع کا انعقاد کیا گیا ۔اس موقع پر ڈپٹی ڈائریکٹر زراعت (توسیع) سیالکوٹ ڈاکٹر رانا قربان علی خاں، اسسٹنٹ ڈائریکٹرمحکمہ زراعت سمبڑیال ڈاکٹرافتخار احمد وڑائچ، فیلڈ آفیسر محکمہ زراعت سمبڑیال محمد ذیشان گورائیہ، اسسٹنٹ ڈائریکٹر ایگریکلچر واٹر مینجمنٹ ڈیپارٹمنٹ نجم شاہ رخ، فیلڈ اسسٹنٹ امجد فاروقی کے علاوہ کسانوں کی بڑی تعداد نے شرکت کی۔

اجتماع میں ڈپٹی ڈائریکٹر زراعت (توسیع) سیالکوٹ نے بطور مہمان خصوصی شرکت کی۔

(جاری ہے)

انہوں نے حاضرین کو محکمہ زراعت توسیع کے جاری منصوبوں کے بارے میں تفصیل سے آگاہ کیا، کسان کارڈ کے فوائد اور کسان کارڈ کے لیے درخواست دینے کے طریقہ کار پر روشنی ڈالی۔انہوں نے گرین ٹریکٹرز سکیم کا ہدف، بکنگ، ڈیلیوری اور ٹریکٹرز کی تصدیق، ضلع سیالکوٹ میں گندم کی فصل کی صورتحال، مزید گندم کی ترغیب کے لیے گندم کے رقبے کی تصدیق، سیالکوٹ میں سموگ کی سرگرمیوں کے بارے میں بتایا ۔

انہوں نے حاضرین سے کہا کہ وہ چاول کی نرسری کی جلد بوائی سے گریز کریں، آخر میں کاشتکاروں سے سوال و جواب کا سیشن ہوا۔ اسسٹنٹ ڈائریکٹر زراعت (توسیع) سمبڑیال نے گندم کی زیادہ سے زیادہ پیداوار کے لیے اہم نکات پر روشنی ڈالی جن میں کھاد کا متوازن استعمال، اہم مراحل پر آبپاشی شامل ہیں۔فیلڈ آفیسر محکمہ زراعت سمبڑیال نے حاضرین کو گندم کی زیادہ سے زیادہ پیداوار کے حصول کے لیے اہم نکات سے آگاہ کیا۔

ایگری کلچر آفیسر/ پیسٹی سائیڈ انسپکٹر محکمہ زراعت سمبڑیال نے حاضرین کو پودوں کے تحفظ کے اقدامات بالخصوص پیلے اور بھورے زنگ کے کنٹرول کے بارے میں آگاہ کیا۔اسسٹنٹ ڈائریکٹر ایگریکلچر واٹر مینجمنٹ ڈیپارٹمنٹ نے حاضرین کو اپنے محکمے کے جاری منصوبوں بشمول سولر سکیم، ڈرپ اور اسپرنکلر ایریگیشن سسٹم سبسڈی کے بارے میں آگاہ کیا۔