کاشتکار بہاریہ کماد کی کاشت کےلئے بیج کا انتخاب کرتے وقت احتیاط سے کام لیں،محکمہ زراعت سیالکوٹ

جمعرات 27 فروری 2025 13:00

سیالکوٹ (اُردو پوائنٹ اخبارتازہ ترین - اے پی پی۔ 27 فروری2025ء) ڈپٹی ڈائریکٹر محکمہ زراعت (توسیع) سیالکوٹ ڈاکٹر رانا قربان علی خان نے کہ ہے کہ کاشتکار بہاریہ کماد کی کاشت کے لئے بیج کا انتخاب کرتے وقت احتیاط سے کام لیں۔انہوں نے اے پی پی سے گفتگو کرتے ہوئے کہا کہ کاشتکار کماد کی بوائی کے لئے ایسے کھیتوں سے بیج کا انتخاب کریں جو مکمل صحت مند ہو، کورے سے متاثرہ اوررتہ روگ یاکسی بھی اوربیماری سے بیج بالکل پاک ہونا چاہیے۔

بیج کاٹنے سے پہلے گنے کی آنکھوں کا اچھی طرح معائنہ کر لیں۔بیج کےلئے کاٹے گئے ٹکڑوں پر کم از کم دو یا تین آنکھیں موجود ہونی چاہیں۔گنے کی آنکھوں کو زخمی ہونے سے بچانے کے لئے درانتی یا پلچھی کا استعمال نہ کریں اور گنے کی کھوری اپنے ہاتھوں سے اتاریں۔

(جاری ہے)

انہوں نے کہا کہ بیج کے لئے لیری فصل سے انتخاب کریں، مونڈھی فصل سے بیج کا انتخاب بالکل نہ کریں۔

بیج کے لئے گنے کے اوپر والا حصہ استعمال کرنا چاہیے۔بیج تیار کرنے کے بعد بوائی میں دیر نہیں کرنی چاہیے اگر کسی وجہ سے دیر ہو جائے تو بیج کو کھوری سے ڈھانپ کر رکھیں اور وقفے وقفے سے پانی چھڑکتے رہیں تاکہ گنے خشک نہ ہو جائیں۔بیج کو پھپھوندی کش زہروں کے محلول میں 3 سے5 منٹ تک بھگو کر کاشت کریں۔بروقت کاشت اور دیگر موزوں حالات میں فی ایکڑ2 آنکھوں والے30 ہزار سمے یا3 آنکھوں والے20 ہزار سمے ڈالنے چاہیں۔یہ تعداد گنے کی موٹائی کے لحاظ سے100 تا120 من بیج سے حاصل کی جاسکتی ہے۔اگر کاشت میں تاخیر ہو جائے تو محکمہ زراعت کے مقامی ماہرین کے مشورے سے بیج کی تعداد10 تا15 فیصد بڑھائی جا سکتی ہے۔