پاکستان منرلز انویسٹمنٹ فورم 8 اور 9 اپریل کو ہوگا، عالمی اور مقامی سرمایہ کار شرکت کریں گے

جمعرات 27 فروری 2025 16:20

اسلام آباد (اُردو پوائنٹ اخبارتازہ ترین - اے پی پی۔ 27 فروری2025ء) پاکستان میں معدنی وسائل کے شعبے میں سرمایہ کاری کو فروغ دینے کے لئے ”پاکستان منرلز انویسٹمنٹ فورم 2025 “کا انعقاد 8 اور 9 اپریل کو جناح کنونشن سینٹر، اسلام آبادمیں ہو گا۔ یہ فورم ایس آئی ایف سی، وزارت توانائی (پٹرولیم ڈویژن) اوجی ڈی سی ایل اور دیگر شراکت داروں کے اشتراک سے منعقد کیا جا رہا ہے جس کا مقصد ملکی معدنی وسائل میں سرمایہ کاری کے مواقع اجاگر کرنا ہے۔

پی ایم آئی ایف 25 میں اوجی ڈی سی ایل بطورآرگنائزر جبکہ بیرک، پاکستان پٹرولیم لمیٹڈ (پی پی ایل )، ریکوڈک مائننگ کمپنی (آر ڈی ایم سی )، فرنٹیئر ورکس آرگنائزیشن (ایف ڈبلیو او )، ماڑی انرجیزاور دیگر بڑی کمپنیاں بطور شراکت دار شرکت کریں گی۔

(جاری ہے)

تفصیلات کے مطابق یہ فورم عالمی اور مقامی سرمایہ کاروں، حکومتی نمائندوں ، کاروباری اداروں، مالیاتی ماہرین اور پالیسی سازوں کو ایک جمع ہونے کا موقع فراہم کرے گا تاکہ پاکستان کے معدنی وسائل میں سرمایہ کاری کے مواقع کو فروغ دیا جا سکے۔

پی ایم آئی ایف 25 میں حکومت پاکستان ”نیشنل منرلز ہارمونائزیشن فریم ورک 2025“ کا باضابطہ اعلان کرے گی جو سرمایہ کاری کو مزید آسان اور منافع بخش بنانے کے لئے تیار کیا گیا ہے۔ واضح رہے پاکستان معدنی وسائل سے مالا مال ملک ہے جہاں تانبہ، سونا، لیتھیم اور نایاب معدنیات کے وسیع ذخائر موجود ہیں۔ یہ معدنیات توانائی ، ٹیکنالوجی اور بنیادی ڈھانچے کی ترقی کے لئے نہایت اہم ہیں جس سے پاکستان کو عالمی مارکیٹ میں اہم مقام حاصل ہو سکتا ہے۔

یہ فورم پاکستان کے معدنی شعبے میں سرمایہ کاری بڑھانے، جدید ٹیکنالوجی کے فروغ اور پائیدار کان کنی کے طریقوں کو اپنانے میں مددگار ثابت ہوگا۔ عالمی سطح پر بڑھتی ہوئی معدنیات کی طلب کے پیش نظر ’پی ایم آئی ایف 25‘پاکستان کو عالمی منرل مارکیٹ میں نمایاں مقام حاصل کرنے کا موقع بھی فراہم کرے گا۔