صدرٹرمپ کا 2026 فیفا ورلڈ کپ کی تیاری کیلیے وائٹ ہاس ٹاسک فورس بنانے کا اعلان

ہفتہ 8 مارچ 2025 16:15

واشنگٹن (اُردو پوائنٹ اخبارتازہ ترین - این این آئی۔ 08 مارچ2025ء)امریکی صدر ڈونلڈ ٹرمپ نے 2026 کے فیفا ورلڈ کپ کی تیاریوں کے لیے وائٹ ہاس میں ایک ٹاسک فورس قائم کرنے کا اعلان کیا ہے۔غیر ملکی میڈیا رپورٹ کے مطابق یہ ٹورنامنٹ امریکا، کینیڈا اور میکسیکو میں مشترکہ طور پر منعقد ہوگا جس میں 48 ٹیمیں حصہ لیں گی اور 104 میچز کھیلے جائیں گے۔ فائنل میچ 19 جولائی 2026 کو نیو جرسی کے میٹ لائف اسٹیڈیم میں ہوگا۔

صدر ٹرمپ اس ٹاسک فورس کی سربراہی خود کریں گے جبکہ نائب صدر جے ڈی وینس نائب سربراہ ہوں گے۔ یہ ٹیم وفاقی حکومت کی مختلف ایجنسیوں کے تعاون سے ٹورنامنٹ کی سیکیورٹی اور منصوبہ بندی کی نگرانی کرے گی۔ فیفا 2026 ورلڈ کپ کے دوران 100 ملین سے زائد سیاحوں کی آمد متوقع ہے اور اس کے فائنل میں تقریبا 2 بلین سے زائد سیاحوں کی آمد کی توقع کی جا رہی ہے جبکہ اس ایونٹ کے دوران دو لاکھ نوکریاں بھی پیدا ہوں گی۔

(جاری ہے)

فیفا کے صدر جیانی انفینٹینو نے اس اقدام کا خیرمقدم کرتے ہوئے کہا ہے کہ یہ ٹاسک فورس ٹورنامنٹ کی کامیابی اور سیکیورٹی کو یقینی بنانے میں اہم کردار ادا کرے گی۔ انہوں نے مزید کہا کہ یہ ایک بڑا لاجسٹک چیلنج ہے جس کا موازنہ روزانہ کئی سپر بالز کے انعقاد سے کیا جا سکتا ہے۔امریکا 2028 میں کیلیفورنیا میں ہونے والے سمر اولمپکس کی میزبانی بھی کرے گا جو کھیلوں کے کیلنڈر میں ایک اور اہم ایونٹ ہے۔