داود یونیورسٹی ، ہولی کھیلنے پر طالبعلموں کی بے دخلی پر حکم امتناع جاری

پیر 10 مارچ 2025 21:30

کراچی(اُردو پوائنٹ اخبارتازہ ترین - این این آئی۔ 10 مارچ2025ء)عدالت نے داود یونیورسٹی میں ہولی کھیلنے پر طالبعلموں کی بے دخلی پر حکم امتناع جاری کردیا۔کراچی کی مقامی عدالت میں داود یونیورسٹی سے ہولی کھیلنے پر طالبعلموں کی بے دخلی کے خلاف درخواست کی سماعت ہوئی۔عدالت میں وسیم احمد جمالی، ساحل کمار سمیت پانچ طلبا نے فیض ملانو ایڈووکیٹ کے توسط سے درخواست دائر کی، جس پر داود انجینئرنگ یونیورسٹی انتظامیہ سمیت دیگر کو 30 اپریل کیلیے نوٹس جاری کردیے۔

درخواست میں سیکریٹری یونیورسٹی اینڈ بورڈز، رجسٹرار داود یونیورسٹی اور دیگر کو فریق بنایا گیا ہے۔وکیل فیض ملانو ایڈووکیٹ نے دوران سماعت کہا کہ ہندو برادری سے اظہار یکجہتی کے طور پر رنگوں کا تہوار ہولی کے انعقاد کیا گیا، یہ دن منانے کی اجازت کیلیے یونیورسٹی انتظامیہ کو درخواست جمع کرائی گئی۔

(جاری ہے)

انہوں نے مزید کہا کہ انتظامیہ نے درخواست پر کوئی کارروائی نہیں کی اور این او سی جاری نہیں کیا، پرامن سرگرمیوں کے باوجود یونیورسٹی نے درخواست گزاروں کے خلاف مقدمہ درج کرادیا۔

وکیل نے یہ بھی کہا کہ درخواست گزار ضمانت حاصل کرکے یونیورسٹی آئے تو 21 فروری کو شوکاز نوٹس جاری کردیے گئے جبکہ 27 فروری کو دوسرا شوکاز جاری کرکے طالب علموں کو تعلیمی ادارے سے نکال دیا گیا۔درخواست کے وکیل نے کہا کہ یونیورسٹی پورٹل تک درخواست گزاروں کی رسائی روک دی گئی ہے، یونیورسٹی کے فیصلے سے طلبا کا تعلیمی نقصان ہوگا، فیصلے کو معطل کیا جائے۔وکیل نے موقف اختیار کیا کہ درخواست گزاروں کا موقف سنا جائے اور جواب داخل کرنے کی اجازت دی جائے۔