وزیراعلیٰ مریم نوازشریف کی ڈرون حملوں کی شدید مذمت ،اداروں کو ہمہ وقت الرٹ رہنے کی ہدایت

جمعرات 8 مئی 2025 23:54

لاہور (اُردو پوائنٹ اخبارتازہ ترین - این این آئی۔ 08 مئی2025ء) وزیر اعلیٰ پنجاب مریم نواز شریف نے لاہور سمیت دیگر مقامات پرڈرون حملوں کی شدید مذمت کرتے ہوئے بھارتی ڈرون بروقت گرانے پر پاک فوج کو خراج تحسین پیش کیا ہے ۔وزیراعلیٰ مریم نوازشریف نے انتظامیہ، پولیس، ریسکیو سروسز اور پاک فضائیہ کے بروقت ریسپانس کو سراہا۔ انہوں نے لاہور، گوجرانوالہ، چکوال، راولپنڈی، اٹک، بہاولپور او ردیگر شہروں میں پولیس، انتظامیہ اور دیگر اداروں کو ہمہ وقت الرٹ رہنے کی ہدایت کی اور ڈرون حملو ں میں زخمیوں کی جلد صحت یابی کی دعا کی ۔

وزیراعلی مریم نوازشریف نے پنجاب کے مختلف شہروں میں ڈرون حملوں کے دوران زخمی شہری او رافسران کے بہترین علاج ،متعلقہ علاقوں میں انتظامی افسران کو زخمیوں کے علاج کی مانیٹرنگ کی ہدایت کی ہے ۔

(جاری ہے)

مریم نواز شریف نے کہا کہ کمسن بچوں سمیت بے گناہ شہریوں کو شہید کر کے بھارت نے ننگی جارحیت کا ارتکاب کیاہے،بھارت کوبے گناہ شہریوں پر حملے کا خمیازہ بھگتنا ہوگا،پوری قوم پاک فوج کے افسران اور سپاہیوں کو سلام پیش کرتی ہے۔

انہوںنے کہا کہ دنیا بھر میں بھارتی پائلٹ کی نااہلی اور ناکامی کا استعارہ بن چکے ہیں،بھارت کا غرور رافیل طیارے زمین پر ملبے کا ڈھیر بن چکے ہیں، شہداء کا خون رائیگاں نہیں جائے گا، ایک ایک قطرے کا حساب دینا ہوگا۔بھارت نے آبی ذخائر پر حملہ کر کے عالمی قوانین کی واضح خلاف ورزی کی۔