امرودکے باغبان نئے پودے لگانے کا عمل 15اپریل تک مکمل کرلیں، محکمہ زراعت

منگل 11 مارچ 2025 16:14

فیصل آباد (اُردو پوائنٹ اخبارتازہ ترین - اے پی پی۔ 11 مارچ2025ء) محکمہ زراعت نے کہاکہ امرود کا پودا ہر قسم کی زمین میں لگایاجاسکتاہے تاہم بہترین نتائج اوراچھی پیداوار کیلئے ذرخیز میرازمین انتہائی موزوں ہے لہٰذا باغبان لاڑکانہ صراحی، سرخا، شرق پوری گولہ اور صدا بہار نامی اقسام کے نئے پودے لگانے کا عمل 15 اپریل تک مکمل کرسکتے ہیں۔ڈپٹی ڈائریکٹر محکمہ زراعت توسیع عدیل احمد نے کہا کہ باغبان امرود کا پودا لگانے کیلئے زمین کو اچھی طرح تیارکر لیں اور گوبر کی گلی سڑی کھاد کا زیادہ استعمال کریں۔

انہوں نے کہاکہ ویسے تو امرود کی درجنوں اقسام زیر کاشت ہیں تاہم لاڑکانہ صراحی، سرخا، شرق پوری گولہ اور صدا بہار اپنے ذائقے، لذت اور خوبصورتی میں نمایاں مقام رکھتے ہیں۔

(جاری ہے)

انہوں نے کہاکہ امرود جہاں کھانے میں انتہائی لذیز ہے وہیں یہ بہت سے جسمانی امراض میں بھی انتہائی مؤثر ثابت ہواہے۔انہوں نے کہاکہ امرود میں شامل آئرن اور وٹامن کی وافر مقدار نزلہ، زکام، کھانسی، وائرل انفیکشن سے نجات دلاتی ہے۔

اسی طرح امرود کا استعمال انسان کو ایگزیما سمیت دیگر جلدی امراض اور کاسمیٹکس کے استعمال سے پہنچنے والے جلدی نقصان سے بھی بچاتاہے۔ انہوں نے بتایاکہ امرود میں موجود حیاتین، پوٹاشیم جسم کے اندر موجود زہریلے و فاسد مادوں کو بآسانی خارج کرنے میں مدد دیتاہے۔ اسی طرح امرود کا استعمال بڑھاپے کی جھریوں، مسوڑھوں کی سوزش، دانتوں سے خون کی آمد بند کرنے سمیت آنکھوں کی بیماری موتیاسے بھی بچاؤ میں معاون ہے۔ انہوں نے بتایا کہ مزید تفصیلات کیلئے ماہرین زراعت یا محکمہ زراعت سے بھی رابطہ کیاجا سکتا ہے۔

Facebook Twitter Google + Share on Whatsapp

امرودکے باغبان نئے پودے لگانے کا عمل 15اپریل تک مکمل کرلیں، محکمہ زراعت

متعلقہ عنوان :

مزید زراعت کی خبریں